मकवानपुरको इन्दसरोवर गाउँपालिका सिस्नेरीमा रहेको अखिल नेपाल फुटबल संघ (एन्फा) एकेडेमीका ६ जना विद्यार्थीको बेपत्ता भएका छन् । उनीहरुको अवस्था अज्ञात छ ।
बिहीबारदेखि अविरल वर्षाका कारण कुलेखानीको ड्याम खोलेपछि सुरक्षित स्थानतर्फ जाने क्रममा विद्यार्थीहरु पहिरोमा परेको एकेडेमी संयोजक सुवासचन्द्र ठकुरीले जानकारी दिए । उनले ६ जना विद्यार्थी पहिरोमा परेको बताए ।
संयोजक ठकुरीले फुटबल प्रशिक्षकहरुले विद्यार्थीलाई एकेडेमी सञ्चालन गरिएको बत्सला माविबाट माथितिर गाउँमा लैजाने क्रममा पहिरोमा परेको जानकारी दिए । हराएकाहरुको खोजी कार्य भइरहेको र केहि विद्यार्थीको पहिरोले पुरेको अवस्थामा शरिरका केहि भाग देखिएको बताए ।
संयोजक ठकुरीका अनुसार बेपत्ता विद्यार्थीहरुमा मकवानपुरका अनुप घलान, दिवस बानियाँ र सुमन योञ्जन, धादिङका रियान्स आचार्य, सलाृहीका आदित्य बलम्पाकी र बाराका विकल रेग्मी रहेका छन् । एन्फाले गतवर्ष श्री बत्सलादेवी हाई सेकेन्डरी इन्जिनियरिङ स्कुलसँग सहकार्य गर्दै सिस्नेरीमा ४० विद्यार्थीलाई एकेडेमीमा राखेको थियो ।