- वि.सं २o८१ असोज १२ शनिबार
नारायणी नदीको बाढीले सुस्ता डुबानमा परेको छ। लगातारको वर्षाले अत्यधिक जलभण्डार भएको नारायणी नदीको भँगालो बस्तीतर्फ पसेपछि स्थानीयलाई प्रभावित भएका छन्।
गाउँ डुबानमा परेपछि सुस्तावासी विस्तापित भएका छन्। अत्यावश्यक लत्ताकपडा र खानेसामग्रीको जोहो गर्दै उनीहरू सुरक्षित स्थानतर्फ सरिरहेको सुस्ता बचाउ अभियानका कार्यबाहक अध्यक्ष आदम खानले जानकारी दिए।
उनले प्रत्येक वर्ष नारायणी नदीको भंगालो पसेर बस्ती डुबानमा पर्दा सुस्तावासीको जनजीवन प्रभावित हुने गरेको बताए। ‘अहिले बाढी पसेपछि सुस्तावासी त्रसित भएका छन्,’ खानले नयाँ पत्रिकासँग भने, ‘घर डुबानमा परेपछि सुरक्षित आवासको खोजीमा धेरैजना विस्थापित हुनुपरेको छ।’
सुस्ता बचाउ अभियानका प्रवक्ता रवीन्द्र जयसवालले अहिलेसम्म २५ घर डुबानमा परेको जानकारी दिए।
पानीको उच्च बहावपछि नारायणी नदीका सबै ढोका खुला गरिएको छ। गण्डक ब्यारेजमा अहिले पानीको बहाव चार लाख ३२ हजार दुई सय क्युसेक पुगेको छ। साढे चार लाख क्युसेक पानीको बहाव पुगेपछि यहाँ खतराको रूपमा मान्ने गरिन्छ।
