- वि.सं २o८१ बैशाख २० बिहीबार
नेपालका लागि बंगलादेशका राजदूत सलाहुद्दिन नोमान चौधरीले उपराष्ट्रपति रामसहायप्रसाद यादवसँग बिहीबार शिष्टाचार भेट गरेका छन् । भेटमा उपराष्ट्रपति यादवले हालका वर्षहरूका दुई देशबीचको व्यापार बढ्दै गएको उल्लेख गर्दै थप विस्तार र विविधीकरणमा जोड दिएका छन् ।
भेटमा उपराष्ट्रपति यादवले नेपालको जलविद्युत् क्षमता र बंगलादेशको बढ्दो ऊर्जा आवश्यकताले दुई देशबीच ऊर्जा सहयोग अभिवृद्धि गर्ने अवसर उपलब्ध भएको बताए । उपराष्ट्रपतिको सचिवालयद्वारा जारी नोटमा भनिएको छ– बंगलादेश सरकारले हालै (६ डिसेम्बर २०२३ मा ) भारतको पावर ग्रिड प्रयोग गरेर नेपालबाट ४० मेगावाट बिजुली खरिद गर्न स्वीकृत गरेकोमा हामी खुसी छौँ ।
ऊर्जा क्षेत्रमा बंगलादेशको लगानीलाई नेपालले स्वागत गरेको बताउँदै उपराष्ट्रपति यादवले नेपालको माथिल्लो कर्णाली जलविद्युत् आयोजनाबाट पाँच सय मेगावाट बिजुली आयात गर्न बंगलादेश र भारतको जिएमआरबीच भइरहेको वार्ता र सुनकोशी–३ आयोजनामा संयुक्त लगानीसम्बन्धी बंगलादेशको प्रस्ताव उत्साहजनक रहेको पनि बताए ।
राजदूत चौधरीले नेपाल र बंगलादेशबीचको सम्बन्ध व्यापार, पर्यटन, शिक्षा र ऊर्जालगायत आयामहरूमा आधारित रहेको उल्लेख गरे । उनले हरेक वर्ष तीस हजार बंगलादेशी पर्यटक नेपाल आउने गरेको पनि उल्लेख गरे । बंगलादेशले नेपाली विद्यार्थीका लागि चिकित्साशास्त्रलगायतका विषयमा छात्रवृत्ति उपलब्ध गराउँदै आएको राजदूत चौधरीले उल्लेख गरे ।
