उपाधिका लागि नेपाल र युएई भिड्दै, कप्तान देवको शतकमा नेपालले युएईलाई दियो २८१ रनको लक्ष्य

एसिसी यू– १९ प्रिमियर कपको उपाधिका लागि नेपाल र युएई भिडिरहेका छन् । मलेसियामा जारी प्रतियोगिताको फाइनलमा टस जितेको नेपालले पहिला ब्याटिङ गर्दै युएईलाई दुई सय ८१ रनको लक्ष्य दिएको छ । 

कप्तान देव खनालको कीर्तिमानी शतकमा नेपालले निर्धारित ५० ओभरमा आठ विकेट गुमाउँदै दुई सय ८० रन बनाएको हो । नेपालका लागि उत्तम थापामगरले ५७ र ओपनर अर्जुन कुमालले ५५ रनको महत्वपूर्ण इनिङ खेले । दीपक डुम्रेले २८ रनको योगदान गरे । विकेटकिपर उत्तमले पहिलो खेलमै छाप छोडे । 

देवले ९२ बलमा नाै चौका र तीन छक्का प्रहार गर्दै एक सय रन बनाए । नेपालबाट यू– १९ मा सर्वाधिक तीन शतक बनाएका देवले जारी प्रतियोगितामा इरानविरुद्ध पनि शतक प्रहार गरेका थिए । 

खेलमा नेपालको सुरुवात भने राम्रो हुन सकेको थिएन । ओपनर दीपक बोहाेरा पाँच रनमै आउट भए । उनको स्थानमा आएका आकाश त्रिपाठी शून्य रनमै आउट भएपछि नेपाल संकटमा देखिएको थियो ।  तर, अर्जुन र देवले एक सय २५ रनको साझेदारी गरेपछि नेपाल खेलमा फर्किएको हो ।