- वि.सं २o८o असार २४ आइतबार
कांग्रेस रूपान्तरण अभियानले केन्द्रीय समिति बैठकमा दबाब बढाउन ‘रूपान्तरण संवाद’ थालेको छ । अभियानले पहिलो चरणमा ७७ वटै जिल्लाबाट आएका सुझाव समेटेर शनिबारबाट चरणबद्ध संवाद थालेको हो ।
सोहीअनुसार अभियानले वाल्मीकि क्याम्पसमा प्राध्यापकहरूसँग छलफल गरेको छ । केन्द्रीय सदस्य मधु आचार्यले सबैसँग छलफलपछि दोस्रो चरणको कार्यक्रमबारे टुंगो लाग्ने बताए । ‘पहिलो चरणमा नेतृत्व सुधार या परिवर्तनको सुझाव आएको छ । यसलाई केन्द्रीय समिति बैठकमा पनि लैजान्छौँ । सबैसँग छलफलमा छौँ, सुझावका आधारमा दोस्रो चरणको कार्यक्रम तय हुन्छ,’ उनले भने ।
अभियानले केन्द्रीय समिति बैठकपछि थप कार्यक्रम तय गर्ने रणनीति बनाएको छ । आइतबार महिला नेतृहरूसँग, सोमबार तरुण र युवाहरूसँग र २६ असारमा विद्यार्थीहरूसँग अन्तरक्रिया कार्यक्रम राखिएको छ । २७ असारमा कांग्रेसले केन्द्रीय समिति बैठक बोलाएको छ । नेताहरूले अभियानबाट आएका सुझावलाई केन्द्रीय समिति बैठकमा उठाउने तयारी गरेका छन् । अभियानमा सक्रिय युवा नेता भूपेन्द्रजंग शाहीले सबैसँगको छलफलको सुझावका आधारमा दोस्रो चरणको कार्यक्रम तय हुने बताए ।
कांग्रेस महामन्त्री गगन थापाले पूर्वप्रधानमन्त्री मात्रै प्रधानमन्त्री बन्नयोग्य बन्ने अवस्थाको अन्त्य आवश्यक भएको बताएका छन् । शनिबार राजधानीमा आयोजित कार्यक्रममा बोल्दै उनले आफू वा आफ्नो पुस्ताको व्यक्ति प्रधानमन्त्री बन्नु देशकोे आवश्यकता रहेको बताएका हुन् । उनले आफू पुनः कांग्रेसको संसदीय दलको नेता बदल्न लाग्ने र बदल्न सके आफू वा आफ्नो पुस्ताको व्यक्तिलाई प्रधानमन्त्री बनाउने जिकिर गरे ।
