- वि.सं २o८o बैशाख २६ मंगलबार
बच्चाहरू फेन्सी कपडा लगाउन रुचाउँछन् । बच्चालाई सरल र आरामदायी कपडा लगाइदिनुपर्छ । किनकि, उनीहरू उफ्रने, दौडेन र नाच्ने गरिरहन्छन् । पार्टी तथा समारोहमा लगाउन बजारमा विभिन्न डिजाइनका किड्स वेयर उपलब्ध छन् ।
छोरीका लागि विभिन्न डिजाइनका फ्रक, लेहेंगा, गाउन, स्कर्ट, फूलकारी बुट्टा भरिएका विभिन्न स्टाइलका पाइन्ट तथा जामा बजारमा पाइन्छन् । त्यस्तै, छोराका लागि थ्री–पिस सुट, ढाका वा दौरा–सुरुवाल, जिन्स तथा टिसर्ट पाइन्छन् । चम्किलो रङको कपडा लगाउँदा साना बालबालिका मायालु देखिन्छन् । रातो, हरियो र निलो रङको पहिरनले आकर्षक लुक्स दिन्छ । उनीहरूलाई सक्रिय रहन पनि यस्ता रङले ऊर्जा दिन्छ ।
साना बालबालिकाले आफ्नो कपडा छिटै फोहोर गर्छन् । त्यसैले उज्यालो रङका कपडा कम प्रयोग गर्नुस् । गाढा रङका कपडामा फोहोर वा दाग धेरै देखिँदैन । तपाईंले आफ्ना बच्चालाई प्रिन्ट भएको कपडा पनि लगाइदिन सक्नुहुन्छ । कार्टुन, फूल, पशुपक्षीको चित्र भएको कपडा लगाइदिँदा अझ राम्रो हुन्छ । त्यो चित्र देख्दा उनीहरू रमाइलो मान्छन् ।
