![](https://nayapatrika.blr1.cdn.digitaloceanspaces.com/news/images/Simara-goldcu2023-03-22-08-44-14.gif)
१३औँ जितपुर–सिमरा गोल्डकप फुटबल प्रतियोगिताको तयारी पूरा भएको छ । सिमरा रंगशालामा मंगलबार आयोजकले पत्रकार सम्मेलन गरी सबै तयारी पूरा भएको जनाएको हो । गोल्डकप ९–१८ चैतसम्म हुने आयोजक समितिका महासचिव शम्भुसिंह ठकुरीले जानकारी दिएका छन् । प्रतियोगितामा १० टोलीले उपाधिका लागि प्रतिस्पर्धा गर्नेछन् ।
प्रतियोगितामा आयोजक नव जनजागृति क्लब, केबिए ग्लोबल बिएफसी चितवन, वीरगन्ज युनाइटेड, बागमती युवा, एनआरटी, एपिएफ, चर्च ब्वाइज युनाइटेड, हिमालयन शेर्पा र सातदोबाटो युथ क्लबले सहभागिता जनाउनेछन् । प्रतियोगिताको उद्घाटन खेलमा आयोजक नव जनजागृतिले ग्लोबल बिएफसीकोे सामना गर्नेछ ।
प्रतियोगिताका विजेताले १० लाख र उपविजेताले पाँच लाख रुपैयाँ हात पार्नेछन् । प्रत्येक दिनको उत्कृष्ट खेलाडीलाई १० हजार र स्थानीय उदीयमान खेलाडीलाई १५ हजार दिने आयोजक क्लबका अध्यक्ष रामचन्द्र लामाले बताए । उत्कृष्ट गोलरक्षक, डिफेन्डर, मिडफिल्डर, सर्वाधिक गोलकर्ता र प्रशिक्षकले जनही २० हजार रुपैयाँ प्राप्त गर्नेछन् ।
प्रतियोगिताको सर्वोत्कृष्ट खेलाडीले एक थान मोटरसाइकल वा स्कुटर प्राप्त गर्नेछन् । प्रतियोगिता अवधिभर खेलाडी, प्रशिक्षक र अफिसियलको १० लाख, दर्शक र पत्रकारका लागि पाँच लाखको बिमासमेत गरिएको आयोजकले जनाएको छ ।