Skip This
सरकारले प्रत्यक्ष वैदेशिक लगानी (एफडिआई)को न्यूनतम सीमा दुई करोड रुपैयाँ तोकेको छ । विदेशी लगानी आकर्षित गर्न भन्दै सरकारले यसअघिको पाँच करोडको सीमालाई घटाएर नयाँ सीमा तोकेको हो । चालू आर्थिक वर्षको बजेटको व्यवस्थाअनुसार सरकारले राजपत्रमा सूचना प्रकाशन गर्दै विदेशी लगानीका लागि नयाँ न्यूनतम सीमा तोकेको हो ।
‘विदेशी लगानी तथा प्रविधि हस्तान्तरण ऐन, २०७५ को दफा ३ को उपदफा ३ ले दिएको अधिकार प्रयोग गरी विदेशी लगानीको न्यूनतम सीमा तोक्ने निर्णय गरिएको छ,’ सूचनामा उल्लेख छ, ‘विदेशी लगानीको न्यूनतम सीमाप्रति विदेशी लगानीकर्ता दुई करोड रुपैयाँ तोकिएको छ ।’ यसअघि १५ जेठ ०७६ मा राजपत्रमा सूचना प्रकाशन गर्दै विदेशी लगानीको न्यूनतम सीमा पाँच करोड रुपैयाँ तोकिएको थियो । त्यसअघि यस्तो सीमा ५० लाख रहेको थियो ।
नेपाल उद्योग वाणिज्य महासंघ, नेपाल उद्योग परिसंघलगायत संघ–संस्थाले विदेशी लगानीको सीमा घटाउन माग गर्दै आएका थिए । तर, नेपाल घरेलु तथा साना उद्योग महासंघले भने न्यूनतम सीमा अझ बढाउनुपर्ने माग गर्दै आएको छ ।
