- वि.सं २o७९ कार्तिक २९ मंगलबार
भौगोलिक रूपमा अत्यन्त विकट हिमाली जिल्ला हुम्लाका खटिएका मतदान अधिकृतसहितका कर्मचारी जोखिम मोलेर मतदान केन्द्र पुगिरहेका छन् । ४ मंसिरमा हुने प्रतिनिधिसभा तथा प्रदेश सभा सदस्य निर्वाचनका लागि उनीहरू खटिएका हुन् ।
गत १९ असोजमा परेको अविरल वर्षाले क्षतविक्षत बनाएका बाटाघाटामा जोखिम मोल्दै मतदान केन्द्रतिर खटिनुपरेको अदानचुली गाउँपालिका– ४ स्थित सुपाखेत आधारभूत विद्यालय बारीगाउँ मतदान केन्द्रमा खटिएका मतदान अधिकृत विष्णुलाल सार्कीले बताए ।
मुख्य निर्वाचन अधिकृतको कार्यालयले २६ कात्तिकदेखि कर्मचारी खटाएको थियो । त्यसलगत्तै टोलीहरू हिँडेका थिए । निर्वाचन सामग्री बोकेर लैजाँदा जिल्लाका खार्पुनाथदेखि सर्केगाडको दुल्लीकुनासम्मको बाटो कष्टकर बनेको सार्कीले बताए । ताँजाकोट गाउँपालिका– १ स्थित जनप्रकाश मावि काँडागाउँ मतदान केन्द्रमा चुनाव गराउन खटिएका मतदान अधिकृत कालीबहादुर बुढाले पनि निकै जोखिमका साथ मतदान केन्द्र पुगेको बताए ।
हालसम्म सर्केगाड, चंखेली, अदानचुली र ताँजाकोटका २७ वटा मदातन केन्द्रका मतदान अधिकृत निर्वाचन सामग्रीसहित मतपत्र बुझेर खटिइसकेका छन् । दक्षिणी र मध्य भेगका गाउँपालिकाका मतदान अधिकृतहरूले निर्वाचन कार्यालय हुम्लाले खरिद गरेका र मतदान केन्द्रमा आवश्यक पर्ने १५ प्रकारका सामग्री लगेको जिल्ला निर्वाचन निमित्त अधिकारी श्यामबहादुर रानाले जानकारी दिए ।
