संविधानको धारा ७६ (२) अनुसार बहुमत नपुग्ने भएपछि प्रमुख प्रतिपक्षी दल कांग्रेस सरकारको नेतृत्वको दौडबाट पछि हटेको छ । जसपा अध्यक्ष महन्थ ठाकुर पक्ष प्रधानमन्त्री केपी ओलीको पक्षमै उभिने भएपछि कांग्रेसले सरकार गठनका लागि बहुमत पु¥याउन नसकेको हो ।
बुढानीलकण्ठस्थित सभापति शेरबहादुर देउवाको निवासमा बसेको पदाधिकारी बैठकले बहुमत नपुग्ने भएपछि सरकारको नेतृत्वको दाबी गर्ने अवस्था नबनेको सहमहामन्त्री डाक्टर प्रकाशशरण महतले जानकारी दिए । उनले एकपटक प्रतिनिधिसभामा विश्वासको मत गुमाइसकेका प्रधानमन्त्री ओलीले धारा ७६ को उपधारा (२) बमोजिम जसपासँग मिलेर सरकारको नेतृत्वको दाबी गर्न नमिल्ने तर्क पनि गरे ।
उनले भने, ‘सम्भावना देखिएन । हामी त तयारै हो । संविधानको धारा ७६ को उपधारा २ अनुसार जुन आजसम्म दाबी गर्ने समय थियो । यसभित्र अरू सहयोगी दलहरूको पनि निर्णयको आवश्यकता पथ्र्यो । जसपामा पनि एकमतको निर्णय गर्ने अवस्था देखिएन र माधवजीहरूले पनि निर्णय गर्न सक्नुभएन । त्यसो हुनाले दाबी गर्ने अवस्था अब रहेन । परिणाम नआउने दाबी गर्न जाने कुरा भएन । एक–दुई घन्टामा अचानक समर्थन जुट्ने अवस्था आयो भने बेग्लै कुरा हो । तर, अहिलेसम्म त्यो स्थिति देखिएन । ७६ (२) अन्तर्गत त उहाँ (प्रधानमन्त्री केपी ओली)ले दाबी गर्न सक्नुहुन्न । त्यो त गलत नजिर बस्छ । उहाँले एकपटक संसदमा विश्वासको मत लिन असफल भइसकेपछि फेरि ७६ (२) अन्तर्गत दाबी गर्नु अनुपयुक्त हुन्छ । त्योअनुसार गर्नु हुँदैन भन्ने हाम्रो निष्कर्ष हो ।’
संविधानको धारा ७६ (२) बमोजिमको सरकार गठनका लागि निर्णायक मतको रूपमा रहेको जसपामा महन्थ ठाकुर समूह प्रधानमन्त्री ओलीको पक्षमा छ भने उपेन्द्र यादव समूह विपक्षमा छ ।
