प्रधानमन्त्री केपी ओलीले सुकुमबासी समस्या समाधान गर्ने सरकारको प्रयासमा अवरोध सिर्जना गर्ने काम भएको बताएका छन् । भूमिहीन सुकुमबासी संगठन केन्द्रीय कमिटीले काठमाडौंमा बुधबार आयोजना गरेको राष्ट्रिय भेलालाई सम्बोधन गर्दै ओलीले माधवकुमार नेपालले सुकुमबासी समस्या समाधान गर्ने सकारको प्रयासमा बाधा पु¥याएको बताएका हुन् ।
नेपाललाई भूमि व्यवस्था समाधान हुन नदिने नेताको संज्ञा दिँदै उनले पार्टी छोडेर गएपछि मात्रै आयोगले काम गर्न थालेको दाबी गरे । उनले भने, ‘अघिल्लोपटक म प्रधानमन्त्री हुँदा समस्या समाधान गर्न खोजियो । माधव नेपालले आफ्नो एउटा समर्थक वकिललाई लगाएर मुद्दा लगाएर लच्चिएकोलच्चियै काम हुन पाएन । भूमि व्यवस्था समाधान हुन नदिने, एउटा हाजिरीजवाफ प्रतियोगिताजस्तो चलाइहालुँ । तपाईंहरूलाई म सोध्छु । सुकुमबासी समस्या समाधान हुन नदिने नेताहरूमध्येको मुख्य नेता को हो ? माधव नेपाल । बनेको आयोगलाई काम गर्न नदिएर एउटा नवलपरासीको सुकुमबासी मानसिकताको वकिलले मुद्दा हालेर त्यो आयोगले काम गर्न पाएन । र, यसपटक फेरि हामीले आयोग बनाउनुप¥यो । यो आयोग बनाउन थालेको लगभग तीन वर्ष भयो । पार्टी छोडेर माधव नेपाल ‘पाटी’तिर गएपछि बल्ल आयोग पूरा भयो ।’
प्रधानमन्त्री ओलीले माधव नेपाल, नारायणकाजी श्रेष्ठ र घनश्याम भुसालले सरकारलाई काम गर्न नदिएको भन्दै ‘छलफलवाला मान्छे’को संज्ञा दिए । उनले भने, ‘माधव नेपाल र नारायणकाजी भन्ने दुईजना मान्छे पार्टीमा थिए । तिनीहरू सधैँ छलफल हुनुपर्छ भन्ने । जतिवेला पनि छलफल हुनुपर्छ भन्ने । छलफलवाला मान्छे मैले नेपालमा भेटाएको तीनजना । एउटा माधव नेपाल, अर्को नारायणकाजी श्रेष्ठ, अर्को घनश्याम भुसाल । जहिले जेमा पनि छलफल हुनुपर्छ । छलफल गर्नुपर्छ । सुकुमबासी आयोग बनाऔँ । छलफल गर्नुपर्छ । बनायो । किन बनाइयो ? छलफल हुनुपर्छ । पूर्णता दिऊँ । छलफल हुनुपर्छ । प्रतिनिधि मागौँ । होइन छलफल हुनुपर्छ । छलफलवाला मान्छेहरूले पार्टी छोडे पाटीतिर लागे । तिनीहरूको पाटीको वास हुन थालेपछि आयोग बन्यो । पूर्णता पाएको छ । काम बन्छ ।’
उनले पार्टीमा शुद्धीकरण आवश्यक रहेको र शुद्धीकरण आवश्यक रहेकाहरू आफैँ किनारा लागेको बताए । पार्टी छोडेर पाटीमा गएकाहरूले आफ्नो अभीष्ट पूरा गर्न नेपाल बन्द गरेर जनतालाई दुःख दिने काम गरेको बताए । उनले भने, ‘उनीहरू किन छटपटाएका छन् ? नेपाल बन्द रे ? जनताले के बिगारेको थियो र ? जनतालाई किन दुःख दिनुप¥यो नेपाल बन्द गरेर ? पार्टी छोडेर आफूहरू पाटीमा लाग्छन् । अनि बन्द गरेर जनतालाई दुःख दिने ? बन्द भन्या के ? हिँडडुल गर्न नपाउने । बन्द भन्या के ? पसल खोल्न नपाउने । किन्न जान नपाउने । पढ्न जान नपाउने । बन्द भनेको जनतालाई दुःख दिने । त्यो किन गर्नुपरेको छ ? केका लागि गर्नुप¥यो बन्द ?’
आफूलाई कम्युनिस्ट र क्रान्तिकारी भन्नेहरू नै आफ्नै पार्टीलाई धुलो बनाएर अरूसँग घुँडा टेक्न पुगेको टिप्पणी ओलीको छ । उनले भने, ‘अस्ति माधवकुमार नेपाल शेरबहादुर देउवाजी कोमा गएका थिए । रामका अगाडि हनुमान घुँडा टेकेर बसेजसरी बसेका थिए । अब दुई वर्षको प्रधानमन्त्री तपाईं नै हो । तपाईंलाई नै दिन्छौँ । दुई वर्षको प्रधानमन्त्री खानुहोस् । लेखेर दिन्छाँै क्या लेखेर दिन्छौँ । सही गरेर दिन्छौँ । अनि क्रान्तिका गफ गरेछन् बाहिर निस्केर । कम्युनिस्ट पार्टी धुलो पार्न खोज्ने अनि अन्त गएर घुँडा टेकेर, प्रणाम गरेर, लिखित दिन्छौँ भनेर, ल्याप्चे लगाएर क्रान्तिकारिताको गफ दिने ? उहाँहरू जे हो त्यही प्रकट हुँदै छ । जे हो त्यही देखिँदै छ । मुखुण्डो खुइलियो ।’
ओलीले शुक्रबारको सभामा आउन सबैलाई निम्तो पनि दिए । उनले भने, ‘निम्ता गर्दा चु लेख्ने चलन हुन्छ नि । चुले निम्तो होइन । गा लेखेको छ । टो लेखेको छ । वा लेखेको छ । अथवा गाउँ नै निम्तो, टोलै निम्तो, वाडै निम्तो । त्यसै हिसाबले आउनुहोला । पर्सि हाम्रो भेट हुनेछ । बाँकी कुरा त्यहीँ राख्नेछु ।’
केही मान्छेहरू सरकारलाई असफल बनाउन लागिपरे पनि सरकार आफ्नो उद्देश्यमा कटिबद्ध रहेको उनले दाबी गरे । उनले भने, ‘सरकार आफ्नो उद्देश्यमा फेल हुन तयार छैन । फेल गर्न त लाग्छन् केही मान्छेहरू । छलफल गर्नुपर्छ भन्ने मान्छेहरू । उनीहरूलाई कुरा फिट्नमा आनन्द छ । काम गर्न होइन । काम गर्न नदिने, कुरा फिटेर बस्नुपर्छ ।’
उनले सुकुमबासी समस्या समाधानको विषय मूलभूत विषय भएको भन्दै सरकार समस्या समाधान गर्ने काममा लागेको जिकिर गरे ।
