संयुक्त अरब इमिरेट्स (युएई) मा भइरहेको क्रिकेट प्रतियोगिता इन्डियन प्रिमियर लिग (आइपिएल) मा सट्टेबाजी खेलाएको तथा खेलेको आरोपमा पाँच भारतीयसहित सातजना काठमाडौंमा पक्राउ परेका छन् ।
महानगरीय प्रहरी वृत्त कालिमाटीले कुलदीप शारण र उनका सहयोगीलाई पक्राउ गरेको हो ।
नक्सालस्थित होटेल कोनार्कमा बसेर शारणले सट्टेबाजी खेलाएको प्रहरीले जनाएको छ ।
उनका सहयोगी भारतीय नागरिक सञ्जीव शारण, अनिलकुमार वंशल, नवीन जैन तथा सिन्धुपाल्चोकका प्रदीप घिमिरे, कुलेश्वर बस्ने अजय गौतम, उत्तम सापकोटालाई पक्राउ गरेको हो ।
उनीहरूले एजेन्टहरूमार्फत बाजी लगाउने र पैसा उठाउने गरेको प्रहरीले जनाएको छ । खेल सुरु हुनुभन्दा अगाडि मोबाइलबाटै रेट पठाएर सट्टेबाजी खेलाउँदै आएका थिए ।
उनीहरूमध्ये सञ्जीववको साथबाट ११ हजार, प्रदीपबाट एक लाख ११ हजार, अजयबाट ११ हजार, उत्तमबाट ३१ सय र अनिलबाट ३९ हजार रुपैयाँ प्रहरीले बरामद गरेको छ ।
भारतीय गिरोहसँग मिलेर उनीहरूले सट्टेबाजी खेलाउँदै आएको प्रहरी दाबी छ ।
