सुकुमवासीहरूलाई दयनीय अवस्थामा राखेको सरकारले होल्डिङ सेन्टरभित्रको दुःख लुकाउन उल्टै सञ्चारमाध्यम र अभियन्तालाई प्रवेशमा रोक लगाएको छ । प्रशासनले प्रहरी खटाएर बाह्य व्यक्तिलाई मुख्य गेटबाट रोक्ने गरेको छ भने गेटमा सुरक्षाकर्मी तैनाथ गरेको छ । सरकारले गरेको अमानवीय व्यवहारबारे बोल्न खोजेका सुकुमवासीलाई नबोल्न निर्देशन दिइएको छ ।
‘हामीलाई नबोल्नु भनिएको छ, तर यहाँभित्र थुप्रै समस्या छन्, अपराधीलाई जस्तै एक ठाउँबाट अर्को ठाउँमा सारिरहेको छ, बालबालिकाको बिचल्ली भयो, पढाइ छुट्यो, तर स्थायी रूपमा कहाँ बस्ने हो टुंगो छैन,’ सोमबार भक्तपुरस्थित विद्युत् तालिम केन्द्रको गेटमा भेटिएका एक सुकुमवासीले भने, ‘म अहिले बाहिर गएर खानेकुरा किनेर फर्किँदै छु, बिहान ९ बजे खानेकुरा दिएको थियो, दिउँसो ३ बजेसम्म दिएको छैन, बाहिरबाट आएका व्यक्तिहरूसँग नराम्रो कुरा नगर्नु भनेर आइतबार गृहमन्त्रीज्यूको टोलीले भन्नुभएको थियो, तर बोल्ने र समस्या राख्न पाउनु हाम्रो अधिकार हो ।’
हाल खरिपाटी र बोडेको होल्डिङ सेन्टरमा बसिरहेकाहरूलाई समेत एक–एक गरी बाहिर निस्किन दिइन्छ । उनीहरूको रेकर्ड राखेर प्रहरीले बल्ल बाहिर पठाउँछ । काममा जानेहरूलाई बेलुकी अबेर फर्किएमा गेटमै रोक्ने गर्छ । ‘अहिले धेरैजना प्रहरीहरू यहाँ बस्नुहुन्छ, बढी निगरानी राख्नुहुन्छ, बालबालिकादेखि बुढाबुढी बुबाआमा यहाँ बसोबास गर्नुहुन्छ, पारिवारिक कुरा हुन्छन्, तर सरकारी कर्मचारी र प्रहरी अनावश्यक रूपमा घुमेर निगरानी राखिरहनुभएको छ,’ बोडेस्थित होल्डिङ सेन्टरमा भेटिएका एक सुकुमवासीले भने, ‘तपाईंहरूसँग पनि बाहिर निस्किएको वेला कुरा गर्न पाएको हुँ, अहिले हामी बसिरहेको ठाउँमा चाहिनेभन्दा बढी निगरानी छ ।’
भक्तपुरका प्रमुख जिल्ला अधिकारी विनोदकुमार खड्कासँग नयाँ पत्रिकाकर्मीले सुकुमवासीसँग कुराकानी गर्न अनुमति माग्दा होल्डिङ सेन्टरको गेटबाहिर बोलाएर मात्रै कुराकानी गर्न सकिने बताएका थिए । तर, होल्डिङ सेन्टरमा खटिएको प्रहरीले भने रोक्यो । गृह मन्त्रालयले नै रोक्नु भनेर निर्देशन दिएका कारण सञ्चारकर्मी र अभियन्तालाई रोकिएको ड्युटीमा खटिएका प्रहरीले बताए ।
प्रजिअ खड्कले आफूलाई वस्तुस्थितिबारे सूक्ष्म ढंगले थाहा नभएको बताए । ‘कीर्तिपुरमा रहँदा सुकुमवासीहरूको अनावश्यक कुरा मिडियामा देखाइयो, सरकारी पक्षलाई कमजोर देखाउने प्रयास गरियो, तर व्यवस्थापन गर्न लागेको विषयमा संयमित भएर सूचना दिनुपर्नेमा उल्टै गलत सूचना दिइयो, त्यसेैले कडाइ गरिएको हो,’ उनले भने ।
सरकारले नदीकिनारबाट हटाएर सुकुमवासीहरूलाई चार महिनादेखि होल्डिङ सेन्टरमा राखिरहेको छ । उनीहरूलाई छाक टार्न मात्रै खाना बाँड्ने गरिएको छ । उनीहरूलाई आवश्यक पर्ने पोषिलो खानेकुरासमेत दिइएको छैन । होल्डिङ सेन्टरमा बस्दै आएका प्रवेश राइगाईंका अनुसार चार महिनादेखि माछामासु दिइएको छैन । प्रायः दालभात र प्याकेटको खानेकुरा वितरण गर्ने गरिएको छ । ‘दुई महिनाको सुत्केरीलाई खानेकुराको वास्ता नै छैन, दालभात दिइन्छ, त्यो पनि अति भोक लागेपछि मात्रै,’ उनले भने, ‘कम्तीमा बालबालिका र सुत्केरीहरूलाई त पोषण पुग्ने गरी खानेकुरा दिएको भए हुन्थ्यो, ज्यामी काम गर्न गएर भए पनि अब माछामासु खुवाउँछु ।’
