गृहमन्त्री सुधन गुरुङले माइतीघर मण्डलामा धर्नारत आठ समूहलाई सामूहिक रूपमा स्थलगत भेटेर सबैको माग पूरा गर्ने प्रतिबद्धता जनाएका छन् । धर्नारत समूहको विवरण संकलन तथा समस्या बुझ्न बिहीबार अपराह्न माइतीघर मण्डला पुगेका उनले सरकारले सबैको माग पूरा गर्ने प्रतिबद्धता जनाउँदै आन्दोलन स्थगित गरेर घर फर्किन भनेका हुन् ।
‘तपाईंहरूको माग पूरा गर्न सरकार प्रतिबद्ध छ, धर्ना स्थगित गर्नुहोस् र घर फर्किनुहोस्,’ धर्नारत समूहसँगको भेटमा गृहमन्त्री गुरुङले भने । काठमाडौंमा कोठा नपाउँदाको पीडा झेलेकी दीपा नेपाली, जनावरको अधिकार माग्नेदेखि मिटरव्याजपीडितसम्म न्याय खोज्दै धर्नामा छन् ।
त्यस्तै, बचतकर्ताको २३ अर्ब रुपैयाँभन्दा धेरै रकम ठगी गरेर फरार जिबी राईविरुद्ध पनि पीडितले माइतीघरमा धर्ना सुरु गरेका छन् । पाल टाँगेर धर्ना दिइरहेका उनीरू सडकमै रात बिताउँछन् । दिनभर धर्ना कस्ने उनीहरू रात परेपछि टेन्टमा सुत्छन् ।
जनावरको सुरक्षा मागेर अभियान छेडेका अभियन्तादेखि जबर्जस्ती करणीको आरोप लागेका नेत्रप्रसाद तिमिल्सिनालाई कारबाहीको माग राखेर पीडित पनि धर्नामा छन् । जबर्जस्ती करणीकै कसुर लागेका कर्णबहादुर मल्लविरुद्ध पनि पीडित धर्नामा छन् । त्यस्तै, मिटरब्याजपीडित उमा महतो सात दिनदेखि माइतीघरमै धर्नामा छिन् भने दलित जेन–जी फन्ट र मिर्गौलापीडितहरूको धर्ना पनि त्यहीँ जारी छ ।
