भत्काइएका घरहरूको भग्नावशेषमा व्यापार

सडक विस्तारका क्रममा घरटहरा भत्किए पनि हेटौँडा राप्तीरोडका व्यापारीहरूले भग्नावशेषमै व्यापार थालेका छन् । भत्किएका संरचना, इँटा–ढुंगा, काठ र रडका थुप्रा र अस्तव्यस्त परिवेशकै बिच उनीहरूले पुरानै सटरअगाडि कपडा, जुत्ता–चप्पल, फलफूलदेखि घरायसी दैनिक सामग्री फिँजाएर व्यापार सुरु गरेका हुन् ।

शनिबार पूर्व–पश्चिम राजमार्गअन्तर्गत पर्ने हेटौँडा बजार क्षेत्रमा सडक डिभिजन कार्यालयले २५ गजभित्रका संरचना हटाएपछि अधिकांश व्यापारीका सटर र पसल भत्काइएका थिए । आकस्मिक रूपमा भएको घटनाले व्यवसाय ठप्प हुने जोखिम बढेपछि उनीहरूले वैकल्पिक उपायस्वरूप खुला आकाशमुनि व्यापार सञ्चालन गर्न थालेका हुन् । सुविधाविहीन स्थानमा राखिएका सामान किन्न ग्राहकहरूको भिड पहिलकै जस्तो छ । भौतिक संरचना गुमे पनि व्यवसाय बचाइराख्न इँटा, ढुंगा, काठकै थुप्रोमाथि बसेर उनीहरूले व्यापार गरिरहेका छन् । भौतिक संरचना गुमाएपछि व्यवसाय गुम्ने हो कि भन्ने चिन्ताले खुला व्यापारलाई निरन्तरता दिएको व्यवसायीहरू बताउँछन् । ‘व्यापार नै गुम्ने हो कि भन्ने चिन्ता थियो, त्यसैले भत्केको ठाउँमै पसल चलाइरहेका छौँ,’ एक व्यापारीले भने । सडक विस्तारका कारण क्षति पुगेका व्यापार पुन: सञ्चालनका लागि राहत, पुनर्स्थापना र वैकल्पिक व्यवस्थापन गरिदिन उनीहरूले सरकारसँग आग्रह गरे ।

राजमार्ग विस्तारका क्रममा पीडित बनेका हेटौँडाका स्थानीयले सोमबार जिल्ला प्रशासन कार्यालय मकवानपुर घेराउ गरेका छन् । पीडितहरूले सडक डिभिजनले सर्वोच्च अदालतको आदेशविपरीत घरहरू भत्काएको भन्दै आक्रोश व्यक्त गरे । स्थानीयले सर्वाेच्चको आदेश पालना गर, डोजर आतंक बन्द गर, सडक विस्तारका क्रममा भत्काइएका घर बनाइयोस्, उचित मुआब्जा दिनुपर्ने, सिडिओले राजीनामा दिनुपर्नेजस्ता नारा लगाएका थिए । 

सडक डिभिजन कार्यालय हेटौँडाले रातोमाटेदेखि बुद्धचोक हुँदै राप्ती पुल र बुद्धचोकदेखि चौकीटोल ओरालोसम्म करिब ५१० वटा घर भत्काएपछि स्थानीय र व्यापारी आन्दोलित बनेका हुन् । शनिबार एकाबिहानै डोजर चलाएर घर भत्काइनु मानव अधिकारको ठाडो उल्लंघन भएको भन्दै उनीहरूले आक्रोश पोखेका थिए । मालपोत कार्यालयले मालपोत लिने, स्थानीय सरकारले कर लिने र सडक डिभिजनले घरबारविहीन बनाउने भन्दै लालपुर्जासमेत प्रदर्शन गरेका थिए ।