कर्णाली याक्स स्पोर्टस् प्रालिबाट खेल्न भारतका प्रियांक किरित पन्चाल आज नेपाल आएका छन्। उनी बिहीबार राति एयर इन्डियाबाट दोस्रो नेपाल प्रिमियर लिग (एनपिएल)का लागि नेपाल आइपुगेका हुन्।
ओपनिङ ब्याटर प्रियांकले पछिल्लोपटक भारतीय टिमबाट हङकङ सुपर सिक्सेस खेलेका थिए। ३५ वर्षीय खेलाडीले गुजरातबाट रणजी ट्रफी खेल्ने गर्छन्। १२७ खेलमा आठ हजार ५६६ रन बनाएका छन् । जसमा २९ सतक र ३४ अर्धसतक समावेश छन्। यस्तै, लिस्ट एमा ९७ खेल खेल्दा आठ सतकसहित तीन हजार ६७२ रन बनाएका हन् । टी–२० तर्फ ५९ खेलमा नाै अर्धसतकसहित एक हजार ५२२ रन बनाएका छन्।
यसअघि कर्णाली याक्सले हस्पिटालिटी पार्टनरमा काठमाडौंको होटेल याक एन्ड यती, सहप्रायोजकमा एसियन पेन्ट्स, नेबिको तथा प्लम्बर पाइप्ससँग सम्झौता गरिसकेको छ ।
०८१ मंसिर १५ गतेदेखि पुस ६ गतेसम्म भएको पहिलो संस्करणमा कर्णाली याक्सले दोस्रो क्वालिफायरसम्मको यात्रा तय गरेको थियो । दोस्रो संस्करणमा पनि कर्णालीले ज्ञानेन्द्र मल्ललाई नै प्रशिक्षकमा निरन्तरता दिएको छ। टोलीको कन्सल्ट्यान्ट प्रशिक्षकमा राजु बस्नेत छन्। कर्णाली याक्सले मार्की सोमपाल कामीसँगै गुल्सन झा, नन्दन यादव, विपिनप्रसाद शर्मा, दीपेन्द्र रावत, अर्जुन घर्ती र युनिससिंह ठकुरीलाई रिटेन गरेको छ। अक्सनबाट पवन सर्राफ, युवराज खत्री, इमरान शेख र दीपक डुम्रेलाई अनुबन्ध गरेको थियो।
