एमाले नेता तथा सार्वजनिक लेखा समितिका सभापति ऋषिकेश पोखरेलका निवर्तमान स्वकीय सचिव अनिलकुमार पोखरेलविरुद्ध ३८ लाख ८० हजार ठगी गरी आपराधिक लाभ लिएको आरोपमा किटानी जाहेरी परेको छ । ऋषिकेश एमाले मोरङको अध्यक्ष रहेकै वेला ०७८ पुसमै अनिलविरुद्ध पार्टीमा उजुरी परे पनि गुपचुप राखी उल्टै उनले स्वकीय सचिव बनाएर पुरस्कृत गरेका थिए ।
उच्च अदालत विराटनगरले पोखरेलविरुद्धको उजुरी दर्ता गर्न परमादेश नै जारी गरेपछि पीडित सप्तरीको अग्निसाइर कृष्णासवरन गाउँपालिका– ५ का बौआलाल चौधरीले आइतबार दिएको किटानी जाहेरी मोरङ प्रहरीले दर्ता गरेको हो । छोरी दीक्षालाई एमबिबिएसको इन्ट्रान्समा नाम निकालिदिने भन्दै लिएको ३८ लाख ८० हजार फिर्ता नगरेको र उल्टै ५० लाखको तमसुक बनाएको भन्दै बौआलालले एमाले मोरङदेखि प्रहरीसम्ममा उजुरी दिएका थिए । चौधरीले सुरुमा इलाका प्रहरी कार्यालय रंगेली र पछि हुलाकमार्फत जिल्ला प्रहरी कार्यालय मोरङमा उजुरी दिए पनि प्रहरीले दर्ता गरेको थिएन । जिल्ला प्रहरीले त उजुरीको रेकर्ड नै गायब बनाएको थियो । त्यसपछि चौधरीले अदालतको ढोका ढकढक्याएका थिए । उजुरी अघि बढाउन उच्च अदालत विराटनगरले ३१ भदौ ०८१ मा जारी गरेको परमादेश ११ पुसमा प्रमाणीकरण भएसँगै आइतबार प्रहरीमा पुगेको हो ।
ठगी गरी आपराधिक लाभ लिएको कसुरमा पोखरेलविरुद्ध उजुरी आएको र अनुसन्धान अगाडि बढाइएको मोरङका एसपी नारायणप्रसाद चिमोरियाले बताए । आपराधिक लाभ लिएको किटानी जाहेरी दर्ता भइसकेकाले अब प्रहरीले अनिललाई पक्राउ गरेर मुद्दा दर्ता गरी अनुसन्धान अगाडि बढाउनुपर्ने बौआलालका कानुन व्यवसायी दुर्गा पोखरेलले बताए । वरिष्ठ कृषि प्रसार अधिकृतबाट अवकाश पाएका बौआलाललाई छोरीको एमबिबिएसमा नाम निकालिदिने भनेर चिनजानका व्यक्तिमार्फत विश्वासमा पारी ०७१ देखि ०७३ सम्म अनिलले पटक–पटक गरेर ३८ लाख ८० हजार रुपैयाँ लिएका थिए । अदालतले ३१ भदौ ०८१ मा परमादेश जारी गरेपछि मात्रै ऋषिकेशले उनलाई पिएबाट हटाएका थिए ।
