अमेरिकी राष्ट्रपति निर्वाचित डोनाल्ड ट्रम्पले आगामी प्रशासनमा देशको सिमानाको निरीक्षण गर्न कट्टर आप्रवासन अधिकारी टम होमनलाई फिर्ता ल्याउने बताएका छन्।
७८ वर्षीय रिपब्लिकन उद्योगपतिले आफ्नो राष्ट्रपति कार्यकालको पहिलो दिनदेखि नै अमेरिकी इतिहासकै सबैभन्दा ठुलो कागजातविहीन आप्रवासीहरूको निर्वासन अभियान सुरु गर्ने प्रतिबद्धता व्यक्त गरेका छन्।
‘म पूर्वआइसिई निर्देशक र सीमा नियन्त्रणका दृढसमर्थक टम होमन हाम्रो राष्ट्रको सीमाको जिम्मेवारीमा ‘बोर्डर जार’का रूपमा ट्रम्प प्रशासनमा सामेल हुने घोषणा गर्न पाउँदा खुसी छु,’ ट्रम्पले आफ्नो सामाजिक सञ्जाल ट्रुथ सोसलमा लेखेका छन्, ‘मैले टमलाई लामो समयदेखि चिन्छु र हाम्रो सीमाको प्रहरी र नियन्त्रणमा उनीभन्दा राम्रो कोही छैन।’
ट्रम्पले होमनलाई ‘सबै गैरकानुनी विदेशीलाई उनीहरूको मूल देशमा फिर्ता पठाउने’ जिम्मेवारी दिइने बताए।
सन् २०२० को राष्ट्रपति निर्वाचनमा हार स्वीकार नगरेका ट्रम्पले नोभेम्बर ५ को मतदानमा उल्लेखनीय पुनरागमन गरेका छन्। यसले उनको कट्टर दक्षिणपन्थी दृष्टिकोणले प्रभुत्व जमाएको एक दशकभन्दा बढी अमेरिकी राजनीतिको सुरुवात गर्ने देखिन्छ।
आफ्नो चुनावी अभियानमा उनले कागजातविहीन आप्रवासीहरूविरुद्ध बारम्बार आक्रोश व्यक्त गर्दै अमेरिकाको ‘रगत विषाक्त पार्ने’ व्यक्तिहरू भन्दै हिंसात्मक भाषा प्रयोग गरेका थिए। अमेरिकी सरकारले मेक्सिकोसँगको दक्षिणी सीमा व्यवस्थापनमा वर्षौँदेखि संघर्ष गरिरहेको भए पनि ‘अमेरिकीहरूलाई बलात्कार र हत्या गर्ने आप्रवासीहरू’ले आक्रमण गरिरहेको ट्रम्पले गम्भीर आरोप लगाए।
आप्रवासीहरूले स्थानीय जनसंख्याको अनुपातमा कम अपराधहरू गर्छन् । यद्यपि, महिला र बालबालिकामाथि हिंसात्मक आक्रमणका केही उच्च–प्रोफाइल मामिलाहरूमा विदेशी संदिग्धहरूको नाम राखिएको छ। यसले रिपब्लिकनहरूलाई क्रोधित बनाएको छ।
मेक्सिकोबाट गैरकानुनी रूपमा सीमा पार गर्ने आप्रवासीहरूसँग अमेरिकी सीमा गस्ती मुठभेडहरूको संख्या अहिले ट्रम्पको राष्ट्रपतिको अन्तिम वर्ष सन् २०२० मा जस्तै छ। यो सन् २०२३ डिसेम्बरमा मासिक रेकर्ड दुई लाख ५० हजारमा पुगेको थियो।
ट्रम्पले सन् १७९८ को एलियन एनिमिज एक्ट प्रयोग गरेर आप्रवासी गिरोहहरूलाई सम्बोधन गर्ने वाचा गरेका छन्। उक्त ऐनले संघीय सरकारलाई ‘शत्रु देश’हरूका विदेशीहरूलाई पक्रन र निर्वासन गर्न अनुमति दिन्छ। यो ‘अपरेसन अरोरा’ नाम दिएको सामूहिक निर्वासन अभियानको हिस्सा हो।
अरोरामा एक भाइरल भिडियोमा सशस्त्र ल्याटिनोहरूले एउटा अपार्टमेन्ट ब्लकमा उपद्रो मच्चाएको देखाइएको थियो। यसले ल्याटिन अमेरिकी आप्रवासीहरूले सहरमा आतंक मच्चाएको भन्ने झुटो कथाहरू फैलाएको थियो।
