दसैँका लागि सामग्री बोकेर खासातर्फ आएका चिनियाँ कन्टेनर न्यालम र खासाको बिचबाटोमा अड्किएका छन् । फलफूल र रेडिमेड सामान बोकेका कन्टेनर १४ दिनदेखि न्यालममा रोकिएका हुन् । मुसा, सिल्क, राखेमालगायत ट्रान्सपोर्ट कम्पनीेले ढुवानी गरेका १०३ गाडी चिनियाँ कन्टेनर सामान बिचबाटोमा अड्किएको तातोपानी भन्सारले जानकारी दिएको छ। करिब ८० कन्टेनर सामान सबै दसैँका रेडिमेड सामग्री हुन् ।
दसैँको मुखमा सामान अड्किएको सुनेका तातोपानी भन्सारका प्रमुख भन्सार अधिकृत दयानन्द केसीले आउँदो बिहीबार खासा र न्यालमको स्थलगत निरीक्षण गर्नेछन् ।
‘खासा पुनर्निर्माण र अन्य विविध कारणले कन्टेनर अड्किएको सुनेको छु,’ केसीले भने, ‘तथ्य केलाउन म आफैँ न्यालम जान्छु ।’ नेपाल र चीनको भन्सारबीच खासामा बैठक हुन लागेको पनि उनले जानकारी दिए । १४ दिनदेखि न्यालममा अड्किएका चिनियाँ फलफूल कुहिन लागेको छ। लगभग २३ गाडी स्याउ रहेका छन्। चिनियाँ एक कन्टेनरबराबर नेपाली तीन कन्टेनर हुन्छ। स्याउ बोकेका कतिपय टेलर लामोलामो भएकोले खासासम्म आउन सकेका छैनन् ।
नेपाल हिमालय सीमापार वाणिज्य संघका सचिव आङ्दोर्जे शेर्पाले खासा पुनर्निर्माणअन्तर्गत बिचभागमा सुरुङ निर्माण जारी रहेकाले टेलर रोकिएको बताए। १४ दिनदेखि न्यालममा रहेका गाडीले पार्किङ भाडा दैनिक एक हजार चिनियाँ युयान तिर्नुपर्छ । ‘चिनियाँ गाडी तातोपानी आउन जति ढिला भयो सामानको मूल्य त्यति नै बढी पर्न जान्छ। पार्किङ भाडा, खानाखाजा र ढिला हुँदा तिर्नुपर्ने बैंकको ब्याज सबै जोडिँदा नेपाली उपभोक्तालाई महँगो पर्न जान्छ,’ शेर्पाले भने । दसैँको समयमा धेरै सामान आउने र गाडी क्युमा बस्नु स्वाभाविक भएको मुसा ट्रान्सपोर्टका नेपाली पक्ष नमस्ते ट्रान्सपोर्टका प्रमुख लोप्साङ शेर्पाले बताए ।
यद्यपि, भूकम्पपछिको खासा पुनर्निर्माण मात्रैले कन्टेनर रोकिएका छैनन् । चिनियाँ भन्सारले सामान पठाउन ढिलाइ गरेकोले कन्टेनर बिचबाटोमा रोकिएका हुन् । त्यसैगरी, न्यालम र खासाको बिचमा सुरुङ निर्माण जारी रहेकोले कन्टेनर अड्किएका छन्। चिनियाँ सहरबाट आएका सामानको पल्टी गर्ने ठाउँको अभावले पनि यस्तो समस्या आएको बताइएको छ ।
अगस्ट ३० देखि सेप्टेम्बर ३ सम्म सुरुङको ढलान गर्ने भएकाले अड्किएका कन्टेनर केही दिन खासा प्रवेश गर्न पाउनेछैनन् । तातोपानी भन्सारले चाँडो पहलकदमी नलिने हो भने दसैँका लागि व्यापारीले हालेको सामान समयमै राजधानी काठमाडौं नआउने अवस्था छ ।
