गत सिजनमा म्यानचेस्टर सिटीलाई ‘ट्रेबल’ उपाधि दिलाउन प्रमुख भूमिका निर्वाह गरेका इर्लिन हाल्यान्ड १९ वर्षीया प्रेमिका जोहान्सेनसँग एक सातादेखि फ्रान्समा
अहिले युरोपमा शीर्ष डिभिजन लिग सुरु भएको छैन । विभिन्न युरोपेली लिगमा आबद्ध खेलाडी ब्रेकमै छन् । नयाँ सिजन सुरु नहुँदासम्म खेलाडी परिवार वा प्रेमिकासँग बिदा मनाइरहेका छन् । खेलाडीले अमेरिका वा युरोपका प्रसिद्ध सामुद्रिक तटीय क्षेत्रलाई पहिलो प्राथमिकतामा राखेका छन् । खेलाडीले परिवार वा प्रेमिकासँग रमाइलो गरिरहेको तस्बिर सोसल मिडियामा भेटिन्छन् । म्यानचेस्टर सिटीका प्रमुख स्ट्राइकर इर्लिन हाल्यान्ड पनि ‘ब्रेक’को समय भरपूर सदुपयोग गरिरहेका छन् ।
उनी अहिले १९ वर्षीया प्रेमिका इसावेल जोहान्सेनसँग फ्रान्सको दक्षिणतिरको बीचमा छन् । बेलायती समाचार संस्थाअनुसार हाल्यान्ड र जोहान्सेन एक सातादेखि फ्रान्समा छन् । गत सिजनमा म्यानचेस्टर सिटीले युरोपियन फुटबलमा तीन प्रमुख उपाधि जित्दा नर्वेका स्ट्राइकर हाल्यान्डले उत्कृष्ट प्रदर्शन गरेका थिए । २२ वर्षीय हाल्यान्डले गत सिजनमा समग्रमा ५६ गोल गरे । उनकै प्रेरणादायी प्रदर्शनमा सिटीले इंग्लिस प्रिमियर लिग, एफए कप तथा पहिलोपटक च्याम्पियन्स लिग उपाधि उचाल्दै ‘ट्रेबल’ गरेको थियो ।
प्रशिक्षक पेप ग्वार्डिओलाले गत वर्ष जितेका तीन उपाधि रक्षा गर्नुपर्ने चुनौती रहेको जनाएका छन् । यसमा सबैभन्दा ठूलो हात खेलाडीको रहने उनको तर्क छ । उनले इंग्लिस प्रिमियर लिगको नयाँ सिजन सुरु नहुँदासम्म आबद्ध खेलाडीलाई परिवार वा प्रेमिकासँग समय बिताउन भनेका छन् । खेलाडीलाई क्लबमा फर्कंदा फ्रेस हुन उनले भनेका छन् । सिटीका अधिकांश खेलाडीले प्रशिक्षक पेपकै निर्देशन पालना गरिरहेका छन् ।
जोहान्सेनले स्कुलको अनुमति लिइन्
नर्वेका स्ट्राइकर हाल्यान्डले अधिकतम समय प्रेमिका जोहान्सेनलाई दिएका छन् । रमाइलो पक्ष के छ भने हाल्यान्डकी प्रेमिका अहिले नर्वेको दक्षिण–पश्चिममा रहेको ब्रायन अपर सेकेन्डरी स्कुलमा अध्ययनरत छिन् । जोहान्सेनले स्कुलमा बिदा चलिरहेका वेला प्रेमी हाल्यान्डलाई साथ दिन फ्रान्स पुगेकी हुन् । जोहान्सेनले यसका लागि स्कुल प्रशासनसँग अनुमति लिएकी छिन् । जोहान्सेनका साथीहरूले उनलाई भाग्यमानी केटी भन्ने गर्छन् ।
यी दुवै जोडीले अत्याधुनिक सुविधाले भरिएको सानो जहाज नै बुक गरेका छन् । हाल्यान्ड बिचमा सामान्य रूपमा प्रस्तुत भएका देखिन्छन् । विशेष गरी यी दुवै ‘सनबाथ’मा रमाइरहेका छन् । अक्सर हाल्यान्ड बिदा मनाउन स्पेन पुग्थे । यसपटक उनी प्रेमिकाकै अनुरोधमा फ्रान्स पुगेको एजेन्सीले जनाएको छ । गत सिजन हाल्यान्डले प्रिमियर लिगमा ३५ खेलमा ३६ गोल र च्याम्पियन्स लिगमा १२ गोलको प्रभावशाली प्रदर्शन गरेका थिए ।
