- वि.सं २o७९ श्रावण २३ सोमबार
महोत्तरीको भंगहा नगरपालिका– १ कञ्चजनवनमा एक पुरुषले श्रीमती र सासूलाई मट्टीतेल खन्याएर आगो लगाएका छन् । औरही नगरपालिका– ८ का शंकर सदाले शनिबार राति ससुराली घरमै श्रीमती ३५ वर्षीया प्रमिलादेवी सदा र सासू ६५ वर्षीया रेसमादेवी सदाको शरीरमा मट्टीतेल खन्याएर आगो लगाएका हुन् ।
जिल्ला प्रहरी कार्यालयका अनुसार घरायसी विवादले घटना भएको प्रारम्भिक अनुसन्धानमा देखिएको छ । घाइते दुवैको प्रादेशिक अस्पताल जनकपुरमा उपचार सम्भव नभएपछि काठमाडौं रेफर गरिएको छ । मट्टीतेल खन्याएर आगो लगाउँदा रेसमादेवी सदाको पिठ्युँ, पाखुरा र बायाँखुट्टा जलेको छ ।
प्रमिलादेवी सदाको हात, खुट्टा र छाती जलेको छ । शंकर सदा भने घटनापछि फरार छन् । वैदेशिक रोजगारबाट फर्केपछि शंकर पछिल्लो एक वर्षदेखि ससुरालीमै बस्दै आएका थिए ।
