- वि.सं २o७९ श्रावण १२ बिहीबार
राष्ट्रिय सभा सदस्य खिमलाल देवकोटाले फेवातालवरिपरि मापदण्डविपरीत बनाइएका घर भत्काउन माग गरेका छन्। बिहीबारको राष्ट्रिय सभा बैठकमा उनले ८० प्रतिशत घरहरू विनास्वीकृति र मापदण्डविपरीत बनेको भन्दै नियमन गरी भत्काउन माग गरेका हुन्।
‘फेवातालवरिपरिका ८० प्रतिशत घरहरू अवैध छन् । कतिपयले विनास्वीकृति आठ, नौ तलासम्म घर बनाएका छन् । त्यस्ता घरको नियमन र फेवातालको मापदण्डमा परेका घरहरू भत्काइयोस्,’ उनले भने।
सांसद देवकोटाले अतिक्रमित पोखरा बसपार्कको जग्गा खाली गराई अत्याधुनिक बसपार्क निर्माण गर्न पनि ध्यानाकर्षण गराएका छन्। उनले फेवातालको सिरानमा वाटर स्पोर्टसका लागि पूर्वाधार र पञ्चासे, माछापुच्छ्रे र अन्नपूर्ण हिमालको फेदीसम्म व्यवस्थित पदमार्ग निर्माण गर्न माग गरे।
