सूचना ‘भेरिफाई’ नगरी अनुसन्धान गर्दा निर्दोष १२ दिनदेखि हिरासतमा

जग्गा कारोबार, सहकारी सञ्चालन गर्दाको वैमनस्यताले अपराध कर्ममा

घटनास्थलबाट आएको सूचना ‘भेरिफाई’ नगरी अनुसन्धान अघि बढाउँदा निर्दोष व्यक्ति १२ दिनदेखि प्रहरीको हिरासतमा बस्न बाध्य भएका छन् । प्रहरीले गत २३ असारको साँझ चाबहिलको शान्ति गोरेटोस्थित खाजा पसलबाट पाँचथर तुम्बेया गाउँपालिका–५ का ४२ वर्षीय शिव लिम्बूलाई कस्तुरीको बिनासहित पक्राउ गरेको थियो । पक्राउलगत्तै शिवलाई प्रहरीले हिरासतमा लियो । थप अनुसन्धान गर्न प्रहरीले उनलाई जिल्ला वन कार्यालय काठमाडौं पठायो । हिरासत बसेको १२ दिनपछि पाँचथर चिलिडदिड गाउँपालिका–४ का आदम भनिने सुभाष राईले फसाउने उद्देश्यले बिना शिव चढ्ने मोटरसाइकलमा राखेको खुल्यो । प्रयोगशाला परीक्षणपछि फसाउन प्रयोग गरिएको बिनासमेत नक्कली रहेको खुल्यो । 

घटना शंकास्पद लागेपछि काठमाडौं उपत्यका प्रहरी कार्यालय रानीपोखरीले एसपी दिलीप घिमिरेको संयोजकत्वमा छानबिन समिति नै बनाएको थियो । समितिको अनुसन्धानपछि सुभाषले फसाउने उद्देश्यले शिवको मोटरसाइकलमा नक्कली बिना राख्न लगाएको खुलेको थियो । बिना राख्न उनले गुल्मी मदाने गाउँपालिका–३ का नारायण कार्की भनिने कृष्ण श्रेष्ठलाई प्रयोग गरेका थिए । अनुसन्धानका क्रममा कृष्णले कसुर स्वीकार गरेको कार्यालयका प्रवक्ता एसपी सन्तोषसिंह राठौरले जानकारी दिए । 

एसपी सन्तोषसिंह राठौर
कस्तुरीको बिनाजस्तो देखिने वस्तुसहित एकजना पक्राउ परेका थिए । पछि यस विषयमा गुनासो आयो । हामीले छानबिन समिति बनायौँ । फसाउने उद्देश्यले नै कस्तुरीको बिनाजस्तो देखिने वस्तु शिव चढ्ने मोटरसाइकलमा राखेको सिसिक्यामेरा फुटेजमा देखियो ।

‘कस्तुरीको बिनाजस्तो देखिने वस्तुसहित एकजना पक्राउ परेका थिए । पछि यस विषयमा गुनासो आयो । हामीले छानबिन समिति बनायौँ । फसाउने उद्देश्यले नै कस्तुरीको बिनाजस्तो देखिने वस्तु शिव चढ्ने मोटरसाइकलमा राखेको सिसिक्यामेरा फुटेजमा देखियो,’ उनले भने ।

प्रहरीका अनुसार शिव र सुभाषबीच जग्गा कारोबारका सम्बन्धमा विवाद भएको थियो । यही क्रममा शिवले सुभाषलाई कपनमा कुटपिट गरेका थिए । त्यसैको बदला लिन सुभाषले कस्तुरीको बिना खोजे । बिना फेला परेपछि शिव चढ्ने मोटरसाइकलमा राख्ने योजना बनाए । जसका लागि गुल्मीमा कृष्ण श्रेष्ठलाई प्रयोग गर्ने मनस्थितिमा पुगे । कृष्णलाई भने । उनी राजी भए । त्यसपछि शिवलाई निरन्तर पछ्याउन थाले ।

शिव चाबहिलको शान्ति गोरेटोस्थित खाजा पसलअगाडि मोटरसाइकल पार्क गरी खाजा खाँदै गरेको भेटिएपछि सुभाषले कृष्णलाई घटनास्थल बोलाए । योजनाअनुसार कृष्णले रातो झोलामा लुकाइराखेको बिना शिव चढ्ने मोटरसाइकलको सिटमुनि कोचे । कृष्ण आफ्नो बाटो लागे । सुभाषले भने बिनाको सम्बन्धमा प्रहरीलाई फोन गरे । प्रहरी घटनास्थल पुग्यो । सूचनाअनुसार मोटरसाइकलमा छापा हान्यो । नभन्दै सिटमुनि बिनाजस्तो देखिने वस्तु फेला पर्‍यो । प्रहरीले मोटरसाइकल धनी खोज्यो । खाजा पसलभित्रै रहेको खुलेपछि प्रहरीले शिवलाई त्यहीँ पक्राउ गर्‍यो । सोही दिनदेखि उनी हालसम्म प्रहरी हिरासतमा छन् । सुभाष भने फरार रहेको प्रहरीको भनाइ छ । ‘गलत नियतका साथ शिवलाई सुभाषले फसाएको देखिन्छ । घटनामा प्रहरीको संलग्नता देखिँदैन । योजनाकार सुभाष भने फरार छन् । उनको खोजीमा प्रहरी लागेको छ,’ एसपी राठौरले भने ।

बहुविवाह मुद्दामा साक्षी बसेको इबी साँध्न पेस्तोल प्रयोग

स्कुटरको डिकीमा गोलीसहित पेस्तोल बरामद भएपछि प्रहरीले ललितपुर महालक्ष्मी नगरपालिका–४ का ५४ वर्षीय श्यामकृष्ण श्रेष्ठलाई पक्राउ गर्‍यो । जब अनुसन्धान अघि बढ्दै गयो, गोलीसहितको पेस्तोल अर्कोले राखेको खुल्यो । 

प्रहरीले घटनामा संलग्न ललितपुर महालक्ष्मी–८ लुभुका ४३ वर्षीय अनिल श्रेष्ठ र ५० वर्षीय अख्खनदास श्रेष्ठलाई पक्राउ गरेको छ भने श्यामकृष्णलाई तारेखमा छाडेको छ । महानगरीय प्रहरी परिसर ललितपुरका अनुसार फसाउने उद्देश्यले श्यामकृष्णको स्कुटरमा अनिल र अख्खनदासले दुई राउन्ड गोली र पेस्तोल राखेका थिए । परिसरका प्रवक्ता एसपी सिद्धिविक्रम शाहले फसाउने उद्देश्यले स्कुटरमा गोलीसहितको पेस्तोल राखेको अनुसन्धानबाट खुलेको बताए । 

‘स्कुटरमा गोली र पेस्तोल भेटियो । श्यामकृष्ण भन्ने व्यक्ति पक्राउ परे । घटना अनुसन्धान गर्दै जाँदा उनको स्कुटरमा अनिल भन्नेले गोली र पेस्तोल राखेको देखिन्छ । स्कुटर खोलेको देख्ने सुरक्षागार्डले पनि त्यही बयान दिएका छन् । सहकारीको ऋण नतिर्न, अदालतमा साक्षी बसेको इबी साँध्न अनिलले यस्तो गरेको खुलेको छ,’ उनले भने ।

प्रहरीका अनुसार अनिल, अख्खनदास र श्यामकृष्णको ललितपुरमा सहयोगी बहुउद्देश्यीय सहकारी छ । सहकारीका अध्यक्ष अनिल हुन् । अख्खनदास निवर्तमान अध्यक्ष र श्यामकृष्ण सहकारीको व्यवस्थापक हुन् । यही क्रममा अनिलले सर्लाहीका शिवजी महतोकी श्रीमती सरस्वती खत्रीलाई भगाएर दोस्रो विवाह गरे । प्रहरीमा उजुरी पर्‍यो । लगत्तै अनिल पक्राउ परे । शिवजी पीडित थिए । उनको श्यामकृष्णसँग राम्रो सम्बन्ध थियो । सोही कारण पीडित शिवजीको पक्षबाट उनी अदालतमा साक्षी बसे । जुन विषय अनिललाई मन परेको थिएन । 

अनिलले आफ्नो र परिवारका सदस्यको नामबाट सहकारीबाट दुई करोड ९५ लाख ऋण लिएका थिए । उनले सहकारीमा ऋण तिर्न बन्द गरे । रकम अनियमितता भएको सूचनापछि श्यामकृष्णले अनिललाई ऋण चुक्ता गर्न पटक–पटक भने । तर, उनले मानेनन् । दुई पक्षबीच मनमुटाव भयो । अब अनिल श्यामकृष्णलाई फसाउने षड्यन्त्र बुन्न लागे । जसमा उनले अख्खनदासलाई पनि मिसाए । 

सहकारीको नाममा थियो, प्रदेश ३–०२–०१२प ६२४१ नं. को स्कुटर । वर्षदिनदेखि श्यामकृष्ण चढ्दै आएका थिए । सोही स्कुटरको डिकीमा पेस्तोल र गोली राख्ने योजना बन्यो । योजनाअनुसार अनिलले पेस्तोल र गोली खोजे । फेला परेपछि श्यामकृष्णको निगरानीमा जुटे । स्कुटरको दुईवटा चाबी थियो । एउटा श्यामकृष्ण प्रयोग गर्थे, अर्को अख्खनदाससँग थियो । अनिलले चाबी अख्खनदासबाट लिए । सोही चाबी प्रयोग गरी डिकी खोले । र, गोलीसहितको पेस्तोल राखे । लगत्तै लगातार प्रहरीलाई फोन गरे ।

प्रहरी घटनास्थल पुग्यो । नभन्दै स्कुटरको डिकीमा गोलीसहितको पेस्तोल फेला पर्‍यो । प्रहरीले श्यामकृष्णलाई पक्राउ गर्‍यो । तर, अनुसन्धानका क्रममा श्यामकृष्णले पेस्तोलको स्रोत खुलाउन सकेनन् । प्रहरी अब घटनास्थलआसपासको सिसिक्यामेरा फुटेज संकलनमा जुट्यो । फुटेजको मिहिन ढंगले अध्ययन भयो । यही क्रममा अनिल श्यामकृष्ण चढ्ने स्कुटरमा पुगेको, पेस्तोल राखेको, पुनः झिकेको देखियो । घटनाको रहस्य खुलेपछि प्रहरीले अनिल र अख्खनदासलाई पक्राउ गरेको हो ।