- वि.सं २o७९ असार ३२ शनिबार
नागरिक लगानी कोषले साउन १ गतेदेखि लागू हुने गरी ब्याजदर परिवर्तन गरेको छ । कोषले कर्मचारी बचत वृद्धि स्वीकृत अवकाश कोषमा दिँदै आएको ६ दशमलव ५ प्रतिशतको ब्याजदरलाई वृद्धि गरी ८ प्रतिशत पुर्याएको छ भने ८० प्रतिशत विशेष ऋण सापटीको ब्याजदर ९ दशमलव ५ प्रतिशत निर्धारण गरेको छ ।
त्यस्तै, सवारीसाधन कर्जा र सरल कर्जामा १० दशमलव ५० प्रतिशत आवास कर्जा र शैक्षिक कर्जामा १० प्रतिशत बनाएको छ । नागरिक एकांक योजनामा ९ प्रतिशत, उपदान कोष र लगानीकर्ता हिसाब योजनामा सात दशमलव ५ प्रतिशत ब्याज रकम प्रदान गर्ने निर्णय भएको कोषले जनाएको छ ।
बिमातर्फका सबै कार्यक्रमहरूमा वार्षिक सात दशमलव ५ प्रतिशत ब्याज प्रदान गर्ने निर्णय गरेको छ । कोषले बिमा कार्यक्रमअन्तर्गत निजामती, नेपाली सेना, नेपाल प्रहरी, सशस्त्र प्रहरी बल, सामुदायिक विद्यालयका शिक्षकसहितका राष्ट्रसेवक कर्मचारीहरूको कार्यक्रम सञ्चालनका लागि बिमा शुल्क संकलनको कार्य गर्दै आएको छ ।
