- वि.सं २o७९ असार १० शुक्रबार
नेपालमा मनसुन भित्रिएको २०औँ दिनमा बल्ल कर्णालीसम्म फैलिएको छ । सामान्यतः मनसुन भित्रिएको एक साताभित्र देशभर फैलिएर झरी पर्ने हुन्छ । तर, यो वर्ष औसतभन्दा ९ दिन अर्थात् २२ जेठमै मनसुन भित्रिए पनि देशभर फैलन सकेको छैन ।
पूर्व र मध्य नेपालमा केन्द्रित रहेको मनसुनी वायु शुक्रबार लुम्बिनी र कर्णालीमा पुगेको जल तथा मौसम विज्ञान विभागले विशेष बुलेटिन जारी गरेर जनाएको हो । सुदूरपश्चिममा भने केही दिनभित्र मनसुन प्रणाली प्रवेश हुने आकलन विभागले गरेको छ ।
प्रदेश १ मा २२ जेठमा मनसुन भित्रिए पनि मधेस, बागमती र गण्डकीमा २६ जेठमा मात्र पुगेको थियो । नेपालमा मनसुन भित्रिने सरदर मिति जुन १३ हो। कमजोर मनसुनी वायुले पश्चिमी न्यून चापीय प्रणालीलाई विस्थापित गर्न नसक्दा पश्चिम नेपालमा छिटफुटबाहेक वर्षा हुन सकेको छैन ।
