नेपाल दुवै खेलमा पराजित

नेपाल आइटिएफ एसिया यु–१२ टिम टेनिस प्रतियोगिता (रिजनल क्वालिफाइङ इभेन्ट साउथ एसिया)मा पराजित भएको छ । पुरुषतर्फ श्रीलंकाले नेपाललाई ३–० ले पराजित गरेको छ । पुरुष एकलअन्तर्गत श्रीलंकन खेलाडी मयुरनले आद्रित नेपाललाई ६–० र ६–२ ले हराए । सोमरत्नले बृजेश अर्याललाई ६–४ र ६–४ को सोझो सेटमा पराजित गरे ।

डबल्समा मयुरन र मुथुथन्थ्रीको जोडीले बृजेश र असभसम्राट हाडाको जोडीलाई ६–२ र ६–२ को सीधा सेटमा पाखा लगायो । पुरुषतर्फ बंगलादेशले माल्दिभ्सलाई ३–० ले पाखा लगायो । भारतले भुटानलाई समान ३–० ले हरायो । नेपाल टेनिस संघको आयोजनामा सातदोबाटोस्थित टेनिस कम्प्लेक्समा भइरहेको प्रतियोगिताको महिलातर्फ माल्दिभ्सले नेपाललाई २–१ ले निराश पार्‍यो ।

महिला एकलमा नेपालकी प्राज्ना मानन्धरले कलिमलाई ६–१ र ६–२ को सोझो सेटमा पाखा लगाइन् । अर्कोमा निसानले शिभाली गुरुङलाई ६–१, ३–६ र ६–४ ले पराजित गर्दै खेललाई १–१ को बराबरीमा ल्याइन् । निर्णायक डबल्समा निसान र अलीको जोडीले शिभाली र प्राज्नाको जोडीलाई ६–० र ६–२ ले पाखा लगाउँदै जित सुनिश्चित गरे ।