- वि.सं २o८१ बैशाख २० बिहीबार
जिल्लाभित्रका व्यक्तिबाट जनही दुई हजार र जिल्लाबाहिरबाट आएकासँग जनही दुई हजार पाँच सयका दरले राजस्व उठाउने गरिएको छ
मुगुम कार्मारोङ गाउँपालिकामा यार्सागुम्बा संकलकबाट २५ लाख राजस्व असुली भएको छ । अझै उठाउने क्रम जारी रहेको मुगुम कार्मारोङ गाउँपालिकाले जनाएको छ । उक्त गाउँपालिकाले पाटन क्षेत्रमा यार्सा टिप्न जाने जिल्लाभित्रका प्रतिव्यक्तिबाट दुई हजार र जिल्लाबाहिरबाट आएकालाई प्रतिव्यक्ति दुई हजार पाँच सयका दरले राजस्व उठाउने गरेको छ ।
अझै बढी राजस्व उठाउन गाउँपालिकाको टोली पाटन क्षेत्रमै पुगेर यार्सा टिप्ने व्यक्तिबाट राजस्व असुलउपर गरिरहेको गाउँपालिकाका लेखा अधिकृत जनराज शाहीले बताए । अबैध बाटो प्रयोग गरेर यार्सा संकलक पाटन क्षेत्रमा पहिले नै प्रवेश गरिसकेको हुँदा यसपटक कम राजस्व असुली हुने अनुमान गरिएको उनको भनाइ छ ।
लेखा अधिकृत शाहीले भने, ‘विगत वर्षहरूमा कम्तीमा पाँचदेखि ६ हजार यार्सा संकलकबाट राजस्व असुली हुने गर्थ्यो भने यसपटक स्थानीय निर्वाचनले गर्दा कम मानिस यार्सा टिप्न गएको हुँदा राजस्व पनि कमि उठ्ने सम्भावना छ ।’
मुगुम कार्मारोङ गाउँपालिका- २ मा पर्ने विभिन्न पाटन रिमार, ठूलो कोइकी, सानो कोइकी, छापाखोला, चार्कुलगायत वनमा सुरक्षाकर्मीसहित राजस्व संकलन टोली खटाइएको छ ।
कोरोना महामारीका कारण विगत तीन वर्षदेखि मुगुम कार्मारोङ गाउँपालिकाले यार्साको राजस्व उठाउन पाएको थिएन । गाउँपालिकाको पाटन क्षेत्रमा यार्सागुम्बा संकलनका लागि जेठ १५ गतेदेखि प्रवेश खुल्ला गरिएको हाे ।
