- वि.सं २o७९ जेठ १५ आइतबार
दाङको तुलसीपुरस्थित टारीगाउँ एयरपोर्ट स्तरोन्नतिका लागि बजेट विनियोजन भएको छ । आन्तरिक हवाई सेवाको गुणस्तर बृद्धि तथा पहुँच विस्तार गर्न टारीगाउँ एयरपोर्टसहित डडेल्धुरा, बाग्लुङ, टीकापुर, चौरजहारी, उदयपुरलगायतको हवाई सेवा विस्तारका लागि बजेट विनियोजन गरिएको छ । त्यसका लागि सरकारले १२ अर्व २४ करोड बजेट विनियोजन गरेको अर्थमन्त्री जनार्दन शर्माले बताए । आगामी आर्थिक वर्ष ०७९-८० को बजेट संसदमा प्रस्तुत गर्दै अर्थमन्त्री शर्माले उक्त बजेट विनियोजन गरिएको जानकारी दिएका हुन्। यसअघि टारीगाउँ एयरपोर्टको स्तरोन्नतिका लागि बजेट विनियोजन भएको थिएन ।
टारीगाउँ एयरपोर्टको धावनमार्ग विस्तार गरेमा ठूला जहाज अवतरण गर्ने र हवाई भाडा कम हुने अपेक्षा गरिएको छ । अहिले ७५० मिटर लम्बाइ रहेको धावन मार्ग हुँदा ठूला जहाज अवतरण गर्न सक्ने अवस्था छैन । विमानस्थलको धावनमार्ग १२ सय मिटरको गराउन अभियान पनि थालिएको छ ।
