एमालेले थाल्यो विपक्षी गठबन्धनको तयारी

ओलीले राखे राप्रपा महामन्त्री राणासँग तीनै तहमा तालमेलको प्रस्ताव 

सत्तासाझेदार पाँच दलले स्थानीय तहको निर्वाचनमा तालमेल गरेर जाने निर्णय गरेपछि दबाबमा आएको एमालेले विपक्षी गठबन्धनको तयारी थालेको छ । पाँचदलीय गठबन्धनले तालमेल गरेर जाने निर्णय लिएकै दिन प्रमुख प्रतिपक्षी दल एमालेले राप्रपासँग तालमेलका लागि प्रस्ताव गरेको छ ।

एमाले अध्यक्ष केपी ओलीले बिहीबार नेपालगन्जस्थित होटेल सोल्टीमा राप्रपाका महामन्त्री डा. धवलशमशेर राणासँग चुनावी तालमेलको प्रस्ताव राखेका हुन् । कर्णालीका विभिन्न जिल्लामा भएका चुनावी सभालाई सम्बोधन गरेर काठमाडौं फर्कने क्रममा नेपालगन्जमा रहँदा ओलीले राणासँग डेढ घन्टा छलफल गरेका थिए । छलफलमा अध्यक्ष ओलीले दुई पार्टीबीच तीनै तह (स्थानीय, प्रदेश र संघीय)को चुनावमा सहकार्य गरेर जान प्रस्ताव गरेको राणाले बताए ।

‘एमाले बाँकेका नेताहरूमार्फत अध्यक्ष ओलीले मलाई भेट्न बोलाउनुभयो । होटेल सोल्टीमा हामी दुईबीच डेढ घन्टाजति छलफल भयो,’ नेपालगन्ज नगरप्रमुखसमेत रहेका राणाले नयाँ पत्रिकासँग भने, ‘उहाँले स्थानीय तहमा मात्र नभई प्रदेश र संघीय निर्वाचनमा समेत तालमेल गरेर जान प्रस्ताव राख्नुभयो । दुवै पार्टीबाट निर्णय गरेर छलफललाई निष्कर्षमा पुर्‍याउने समझदारी बनेको छ । त्यसअनुसार अब हामी हाम्रो पार्टीभित्र छलफल गर्नेछौँ ।’ 

सत्तासाझेदार दलले चुनावी तालमेलको तयारी गरेकाले विपक्षी दलहरूले पनि गठबन्धन बनाउनुपर्छ भन्नेमा समझदारी बनेको उनको भनाइ छ । राणाले ओलीसँगको छलफललाई चुनावी तालमेलको पहिलो चरणको छलफलको संज्ञा दिएका छन् । यस विषयमा राप्रपाले छिट्टै आधिकारिक निर्णय सार्वजनिक गर्ने उनले बताए ।

नेपालगन्जको होटेल सोल्टीमा बोलाएर राप्रपा महामन्त्रीसँग चुनावी तालमेलको प्रस्ताव राखेका ओलीले सार्वजनिक रूपमा भने एमाले एक्लै लड्ने बताउँदै आएका छन् । केहीअघि सम्पन्न एमाले केन्द्रीय कमिटी बैठकले पनि स्थानीय तह निर्वाचनमा एक्लै प्रतिस्पर्धा गर्ने निर्णय गरेको थियो । तर, सत्तासाझेदार दलहरूले तालमेलको निर्णय गरेसँगै ओली सम्भावित परिणामले विपक्षी गठबन्धन बनाउनैपर्ने दबाबमा पुगेका छन् । 

ओलीले महन्थ ठाकुर नेतृत्वको अर्को विपक्षी दल लोकतान्त्रिक समाजवादी पार्टीसँग पनि तालमेलका लागि छलफल गर्ने सम्भावना छ । स्थानीय आवश्यकता आधारमा तालमेलमा जान सकिने एमालेको नीति छ । 

राप्रपा महामन्त्री डा. धवलशमशेर राणा भन्छन्–

एमाले बाँकेका नेताहरूमार्फत अध्यक्ष ओलीले मलाई भेट्न बोलाउनुभयो । होटेल सोल्टीमा हामी दुईबीच डेढ घन्टाजति छलफल भयो । उहाँले स्थानीय तहमा मात्र नभई प्रदेश र संघीय निर्वाचनमा समेत तालमेल गरेर जान प्रस्ताव राख्नुभयो । दुवै पार्टीबाट निर्णय गरेर छलफललाई निष्कर्षमा पुर्‍याउने समझदारी बनेको छ । त्यसअनुसार अब हामी हाम्रो पार्टीभित्र छलफल गर्नेछौँ र छिट्टै आधिकारिक निर्णय सार्वजनिक गर्छौँ ।

एमालेले चाहे पाँचदलीय गठबन्धन भत्किने ओलीको दाबी

काठमाडाैं/ एमाले अध्यक्ष केपी ओलीले आफूहरूले चाहँदासम्म मात्र सत्तारूढ गठबन्धन रहने दाबी गरेका छन् । पाँचदलीय गठबन्धनबीच चुनावी तालमेल गरेर जाने निर्णय भएको अर्को दिन एमाले अध्यक्ष ओलीले गठबन्धन भत्काउन धेरै मिहिनेत गर्नु नपर्नेसमेत जिकिर गरे ।

‘अहिले हेर्नुस् त, बिहान–बेलुकै बालुवाटार टुप्लुक–टुप्लुक पुगेका छन् । ‘यो गठबन्धन नटुटाऊँ, गठबन्धन बचाऊँ है’ भनिरहेका छन् । यो गठबन्धन तबसम्म रहन्छ, जबसम्म हामी यसलाई रहन दिन्छौँ,’ शुक्रबार अनेरास्ववियु केन्द्रीय कमिटीको प्रथम बैठक तथा विस्तारित भेलालाई सम्बोधन गर्दै ओलीको दाबी थियो, ‘हामीले धेरै केही गर्नुपर्दैन, छ्यास्स हावा खोलिदिएपछि जान्छ । चारवटा चक्का फुकाल्नुपर्दैन, इन्जिन बन्द गर्नुपर्दैन ।’

एकीकृत समाजवादीसँग सहकार्य गरेको भन्दै ओलीले कांग्रेसको आलोचना गरे । ‘कांग्रेसले बिग्रिएका, सडेका, लोकतन्त्र र राष्ट्रियताविरोधी एवं बिकाउ मालहरूसँग घाँटी जोड्छ । भाँडो कुच्चिएर काम नलाग्ने भएपछि पत्रु भनिन्छ, त्यस्तासँग कांग्रेसले घाँटी जोड्छ । थोत्रा, पत्रु र प्रतिगामी तत्वसँग कांग्रेस जोडिन्छ,’ ओलीले भने, ‘उहिल्यै होस् कि अहिले, कांग्रेस उस्तै छ । कांग्रेसलाई राम्रो कामका लागि राम्रो शक्तिसँग मिल्न बडो मुस्किल छ ।’ 

ओलीले एकीकृत समाजवादीका अध्यक्ष माधव नेपालको विगत र वर्तमानमाथि प्रश्न उठाउँदै उनी कम्युनिस्ट नरहेको आरोप लगाए । ‘कहिले–कहिले भनिन्छ, माधव नेपालले एमाले छाडे । कम्युनिस्टले छाडेको छ र एमाले ? कम्युनिस्टले एमाले छाड्दैन । माधव नेपालजस्ता पत्रु, बिग्रेका र प्रतिक्रियावादीका निम्ति काम गर्ने मान्छेले एमाले छाड्छन्,’ ओलीको भनाइ थियो, ‘कम्युनिस्टको बर्को ओड्नेबित्तिकै जो पनि कम्युनिस्ट हुने हो र ? बर्को ओडेर कम्युनिस्ट हुँदैनन् ।’

११ चैतमा काठमाडौंमा भएको एक कार्यक्रममा नेपालले ओली पूर्वराजासँग मिल्न गएको आरोप लगाएका थिए । ओलीले त्यसको खण्डन गर्दै नेपाल नै राजावादी भएको टिप्पणी गरे । ‘एउटा गठबन्धनवालाले अस्ति भनेको सुनेँ– अब केपी ओली राजासँग मिल्छ । राजाकहाँ छ र केपी ओली मिल्छ ? यिनीहरूको कस्तो बुद्धि हो ! कस्तो मानसिकता ! राजासँग मिल्छ रे ! ’ ओलीले भने, ‘म सम्झाउन चाहन्छु– वरिपरि परिक्रममा गरेर पाउमा दाम राखेर ढोग्ने मान्छे केपी ओली होइन ।’ 

निर्वाचनको मुखमा प्रधानमन्त्री शेरबहादुर देउवा भारत भ्रमणमा गएकोमा ओलीले असन्तुष्टि जनाए । ‘प्रधानमन्त्रीजी विदेश जानुभएको छ, ठ्याक्कै चुनावअगाडि किन जानुभयो कुन्नि ? आएपछि सोध्नुपर्ला– यति समय किन जानुभएन, यतिबेरै किन जानुभयो भनेर । यही समयमा किन जानुभयो भनेर ?’ उनले भने ।