Skip This
आठौँ प्रधानमन्त्री कप महिला भलिबल प्रतियोगिताको उपाधि भारतको हरियाणा स्पोर्ट्स क्लबले हात पारेको छ । नेपालगन्ज रंगशालास्थित कभर्ड हलमा सोमबार सम्पन्न फाइनल खेलमा हरियाणाले पुलिसलाई सोझो सेटमा पराजित गरी उपाधि हात पारेको हो ।
हरियाणाले नेपाल पुलिसलाई २६–२४, २५–२१ र २५–२३ को सेटले पराजित गरेको आयोजक बाँके जिल्ला भलिबल संघका अध्यक्ष टिएस ठकुरीले जानकारी दिए । हरियाणाले नगद पाँच लाख रुपैयाँ, ट्रफी र मेडल हात पारेको छ ।
उपविजेता बन्दै पुलिसले दुई लाख ५० हजार जितेको छ । १० चैतबाट सुरु भएको प्रतियोगितामा त्रिभुवन आर्मी क्लब तेस्रो हुँदै एक लाख र चौथो भएको न्यू डायमन्डले ५० हजार रुपैयाँ पुरस्कार जितेको छ । नेपाल आर्मी क्लबले न्यू डायमन्डलाई २५–२१, २५–८ र २६–२४ को सोझो सेटले पराजित गर्दै तेस्रो स्थान हासिल गरेको हो ।
लिगकम नकआउटका आधारमा भएको प्रतियोगितामा भारत छत्तिसगढको एकलब्य स्पोर्ट्स कम्प्लेक्स र आयोजिक लुम्बिनी युनाइटेड सेमिफाइनल प्रवेश गर्न सकेनन् ।
प्रतियोगितामा ६ वटा टिमले सहभागिता जनाएका थिए । साबिक विजेता एपिएफ क्लबले यसपटकको खेलमा सहभागिता नजनाएको आयोजकले जनाएको छ।
