- वि.सं २o७८ फाल्गुण १० मंगलबार
कञ्चनपुरमा कर्पोरेट क्रिकेट प्रतियोगिता आयोजना हुने भएको छ । स्टार प्रोडक्सनको आयोजना तथा महेन्द्रनगर जेसिजको सहकार्यमा फागुन १४ देखि चैत ५ गतेसम्म ‘फारवेस्टर्न कर्पोरेट क्रिकेट कप २०२२’ प्रतियोगिता आयोजना हुन लागेको हो ।
सुदूरपश्चिमका कर्पोरेट कार्यालयलाई लक्षित गरेर प्रतियोगिता आयोजना गर्न लागिएको प्रतियोगिता संयोजक भोजराज जोशीले जानकारी दिए । कोरोनाले गर्दा खेल अवरुद्ध भएको समयमा पुनः खेलकुदको माहौल बनाउन प्रतियोगिता सञ्चालन गरिन लागेको उनले बताए ।
महेन्द्रनगरको खुलामञ्चमा र कभर्डहलमा गरी दुई ठाउँमा खेल सञ्चालन हुनेछ । प्रतियोगितामा कैलाली र कञ्चनपुरबाट २० टिमको सहभागिता रहने स्टार प्रोडक्सनका अध्यक्ष अक्षत पाण्डेयले जानकारी बताए । सो प्रतियोगितामा विजयी टिमलाई नगद एक लाख पाँच हजारसहित ट्रफी, मेडल र प्रमाणपत्र प्रदान गरिने र द्वितीय टिमलाई नगद ५५ हजारसहित नगद ट्रफी र प्रमाणपत्र प्रदान गरिनेछ ।
म्यान अफ द सिरिजलाई रु. पाँच हजार पाँच सय, बेस्ट ब्याट्सम्यानलाई रु. तीन हजार पाँच सय तथा प्रतियोगिताका बेस्ट बलरलाई रु. तीन हजार पाँच सयसहित ट्रफी र प्रमाणपत्र प्रदान गरिनेछ । रासस
