- वि.सं २o७८ माघ १६ आइतबार
सोलुखुम्बुमा निर्माणाधीन ८६ मेगावट क्षमताको दूधकोसी हाइड्रोपावरको सुरुङमा बेपत्ता मजदुर मृत अवस्थामा फेला परेका छन्। थुलुङ दुधकोसी गाउँपालिका–३ स्थित पन्चनमा निर्माणाधीन हाइड्रोपावरमा सुरुङभित्र पाइप लैजाने क्रममा भएको दुर्घटनामा हराएका मजदुर तीन दिनपछि मृत भेटिएका हुन्।
माघ १३ गते सुरुङभित्र पाइप लैजाने क्रममा स्काभेटर भाँचिएर दुर्घटना हुँदा बाराका २४ वर्षीय राकेश चौधरी बेपत्ता भएका थिए। शनिबार दिउँसो सुरक्षाकर्मीको टोलीले सुरुङभित्र मृत अवस्थामा फेला पारेको जिल्ला प्रहरी कार्यालय सोलुखुम्बुका प्रहरी निरीक्षक ऋषिराज ढकालले जानकारी दिए। उनको शवलाई पोस्टमार्टमका लागि जिल्ला अस्पताल फाप्लु लगिएको छ।
दुर्घटनामा घाइते भएका पर्सा जिल्ला पटेरवा गाउँपालिका–४ का २० वर्षीय आंगत रायको ग्रान्डी अस्पताल काठमाडौंमा उपचार भइरहेको छ।
