बकपत्र उल्ट्याएर थुनामुक्त हुने योजनामा विराटनगरका कुख्यात मिटर ब्याजी मन्टु 

विराटनगरका कुख्यात मिटर ब्याजी ‘मन्टु’ भन्ने सञ्जय रौनियारले जेलभित्रैबाट सबै बादीहरूको बकपत्र उल्टाउन लगाएर  जेलमुक्त हुने तयारी गरेका छन् । घरजग्गा राजीनामा पास गराएर अनि किर्ते कपाली तमसुक बनाएर धाकधम्की दिँदै  अकुत ब्याज असुलेर आपराधिक कार्य गरेको आरोपमा पुर्पक्षका लागि ०७६ माघमा  मोरङ कारागार चलान भएका कुख्यात मिटर ब्याजी  विराटनगर– ९ का ४२ वर्षीय   रौनियारले जेलभित्रैबाट पीडितहरूलाई दबाब र प्रलोभनमा पारेर थुनामुक्त हुने योजना बनाएका हुन् ।

१७ जना पीडितले आफूहरूलाई धाकधम्की दिएर जालझेल गर्दै चर्को मिटरब्याज असुलेर धितो राखेको सम्पत्तिसमेत हडपिएको आरोप लगाउँदै मिटरब्याजी मन्टुविरुद्ध मोरङ प्रहरीमा किटानी जाहेरी दिएका थिए । मोरङ प्रहरीले ०७६ मंसिरमा मन्टुलाई पक्राउ गरेर अनुसन्धान गरी ठगी र आपराधिक लाभ लिएको कसुरमा जिल्ला अदालत मोरङमा अलग अलग मुद्दा दर्ता गराएको थियो । 

अदालतको  आदेशबाट पुर्पक्षका लागि जेल चलान भएका  कुख्यात मिटरब्याजी मन्टुले जेलभित्रैबाट सबै पीडितको  सम्पत्ति फिर्ता दिएर अदालतमा बकपत्र फेर्न लगाइसकेका छन् । स्रोतका अनुसार मन्टुले सम्पत्ति फिर्ता दिँदा पनि बयान फेर्न नमान्नेहरूलाई गुण्डा प्रयोग गरेर धाकधम्की पनि दिएका थिए । यसैले अदालतमा बादी पक्षका सबैले बकपत्र उल्टाइसकेको अदालत स्रोतले बतायो ।   

यसैले सबैले बकपत्रमा बयान फेरेकाले कुख्यात मिटरब्याजी मन्टुले अदालतबाट सफाइ पाएर थुनामुक्त  हुने सम्भावना बढेको छ  । वर्षौँदेखि घरजग्गा धितो पास गराएर नक्कली कपाली तमसुक बनाएर मनमौजी चर्को ब्याज असुलेको आरोपमा मिटरब्याजी मन्टुविरुद्ध १७ जना  पीडितले अलगअलग आपराधिक लाभ लिएर ठगी गरेको आरोपमा  किटानी जाहेरी दिएका थिए । न्यायाधीश पराजुलीको इजलासले सुनुवाइ भएका १७ वटा अलगअलग मुद्दामध्ये चारवटामा धरौटी लिएर अनि बाँकी १३ वटा मुद्दामा पुर्पक्षका लागि चेल चलान गर्न आदेश दिएको थियो  । 

अभियोगपत्रमा मिटरब्याजी मन्टु रुद्ध एक करोड ९२ लाख ८५ हजार रुपैयाँ क्षतिपूर्ति माग दाबी गरिएको छ ।  मन्टुले सर्वसाधारणबाट ९२ लाख कर्जाको सात करोड ७० लाख रुपैयाँ असुली गरेको पीडितहरूको जाहेरीबाट खुलेको छ । यसैगरी मिटरब्याजी मन्टु र उनकी श्रीमतीले जिल्ला मातपोत कार्यालय मोरङबाट तीसजनाभन्दा बढीबाट जग्गा आफ्नो नाममा राजीनामा नामसारी गराएको फेला परेको थियो । कुख्यात मिटरब्याजी मन्टुविरुद्ध सम्पत्ति शुद्धीकरण विभागमा पनि उजुरी दर्ता भएको थियो । मन्टु कतिसम्म धूर्त थिए भने उनले मरिसकेका बाबुको सही किर्ते गरेर भाइलाई वञ्चित गर्दै  एकलौटी घरबहाल सम्झौता गरेर भाडा खाँदै आएका थिए । विराटनगर बुद्धचौकमा रहेको घर अस्पताललाई  भाडा लगाएर  मासिक डेढ लाख भाडा लिए पनि मन्टुले ४० हजार मात्र लिएको भनेर कर छली गरेका थिए । 

पीडितलाई सहयोग गर्नेहरू भयभीत 
दबाब र प्रलोभनमा पारेर सबैलाई बकपत्र उल्टाउन लगाएर थुनामक्त हुन लागेको हल्ला चलेपछि पीडितलाई सहयोग गर्ने सहयोगीहरू कुख्यात मिटरब्याजी मन्टुदेखि भयभीत बनेका छन । जेलमुक्त भएपछि मन्टुले बदलाको भावना राखेर सहयोगीहरूलाई दुःख दिने मात्र नभएर ज्यानसमेत लिन सक्ने जोखिम बढेको सहयोगीहरू बताउँछन् । एक सहयोगीका अनुसार मिटरब्याजी मन्टुबाट ठगीनेहरू अझै धेरै छन् । यसैले थुनामुक्त भएमा उनीहरू पनि जोखिममा पर्नेछन् ।