- वि.सं २०८१ बैशाख ७ शुक्रबार
कांग्रेसले १४औँ महाधिवेशनअन्तर्गत हिमाली जिल्लाहरूमा दसैँअगावै जिल्ला अधिवेशन गर्ने निर्णय गरेको छ । कांग्रेस संसदीय दलको कार्यालय सिंहदरबारमा बसेको पदाधिकारी तथा पूर्वपदाधिकारीहरूको बैठकले यस्तो निर्णय गरेको हो ।
केन्द्रीय निर्वाचन समिति सदस्य तेजबहादुर रावलका अनुसार हिमाली जिल्लामा अहिले सार्वजनिक भएको कार्यतालिकाअनुसार दसैँअगावै जिल्ला अधिवेशन सम्पन्न गर्ने निर्णय भएको हो ।
‘२१ हिमाली जिल्लामा निर्धारित कार्यतालिकाअनुसार नै जिल्ला अधिवेशन सम्पन्न गर्ने निर्णय भएको छ । क्रियाशील नटुंगिएका १३ जिल्लाको विवाद असोज ९ भित्र सम्पन्न गर्ने निर्णय भयो, ’उनले भने, ‘क्रियाशीलको अलग्गै कार्यतालिका बन्ने भयो ।’
हालसम्म कांग्रेसले ६४ जिल्लाको वडा अधिवेशन सम्पन्न गरेको छ । दसैँपछि हिमाली जिल्लाको मौसम प्रतिकूल हुने भएकाले पदाधिकारी बैठकमा यस्तो निर्णय भएको हो । आजको पदाधिकारी बैठकमा निर्वाचन समितिलाई समेत छलफलका लागि बोलाइएको थियो ।
