सर्वोच्चले एमालेलाई भन्यो– एकीकृत समाजवादीमा जान चाहेका दुई सांसदलाई कुनै कारबाही नगर्नू

सर्वोच्च अदालतले नेकपा (एकीकृत समाजवादी)को सांसद कायम गर्न माग गरेका नेकपा एमालेका दुई सांसदलाई कुनै कारबाही नगर्न आदेश गरेको छ । न्यायाधीश मीरा खड्काको एकल इजलासले अन्तरकालीन अन्तरिम आदेश आदेश जारी गरेको हो ।

सर्वोच्चले निर्वाचन आयोगका नाममा सनाखत नगराउनुको कारण माग गर्दै कारण देखाऊ आदेश जारी गरेको छ । निर्वाचन आयोगले नेकपा एकीकृतमा सनाखत गर्न नदिएको भन्दै २३ भदौमा एमाले सांसद सोमप्रसाद पाण्डे र शारदादेवी भट्ट सर्वोच्च पुगेका थिए ।

रिटमा निर्धारित समयमा एकीकृत समाजवादी रोजे पनि निर्वाचन आयोगले सनाखत नगरिदिएको जिकिर गर्दै एमालेले गर्न सक्ने कारबाही रोक्न अन्तरिम आदेश माग गरिएको थियो । अन्तरिम आदेश माग गरेको सम्बन्धमा छलफलका लागि २९ भदौमा पेसी तोकिएको छ। 

‘सो दिन उपस्थित हुन विपक्षीहरूलाई सूचना दिनु र सो मितिसम्म निवेदकहरूलाई प्रतिकूल असर पर्ने गरी कुनै काम कारबाही नगर्नू ’ सर्वोच्चको आदेशमा भनिएको छ ।