- वि.सं २o७८ श्रावण १९ मंगलबार
जिल्लामा निर्माण भएको कारागार भवन प्रयोगविहीन भएको छ । छायानाथ रारा नगरपालिका– ३ स्थित थापालचौरमा आठ वर्षअघि निर्माण कार्य सुरु गरिएको कैदी भवन अहिलेसम्म जिल्ला कारागारलाई हस्तान्त्रण हुन नसक्दा उपयोगविहीन भएको हो । भवन डिभिजन कार्यालय जुम्लाले ०७१ सालमा तीन करोड ५० लाख ठेक्का खोलेर कारागार भवन निर्माण गरे पनि अहिलेसम्म अलपत्र अवस्था रहेको छ ।
नयाँ बनेको कारागार भवन अहिलेसम्म भवन डिभिजन कार्यालयले यहाँको कारागार शाखालाई नबुझाउँदा अलपत्र परेको कारागार कार्यालय प्रमुख दत्त लामाले बताए । उक्त भवनको निर्माणको काम आरसी कन्स्ट्रक्सन धनगढीले लिएको छ भने भवन निर्माण कार्य पुरा भए पनि वरिपरि घेरबार सुरक्षापोस्ट स्थापना नहुँदा उपयोगविहीन भएको छ ।
८० पुरुष र २० महिला गरी सयजना कैदी अट्ने क्षमताको कारागार भवन बने पनि प्रयोगमा नआउँदा कैदी राख्न समस्या भएर बाहिरी जिल्ला पठाउनुपर्ने बाध्यता छ । निर्माण कार्य सुरु भएको तीन वर्षभित्र सम्बन्धित निकायलाई बुझाइसक्ने ठेकेदार पक्ष र भवन डिभिजनको सम्झौता भए पनि अहिलेसम्म दुवै निकाय बेखबर रहेको जिल्ला प्रशासन कार्यालयले जनाएको छ ।
जिल्लाका कैदीबन्दीहरूलाई जुम्ला, बर्दिया, दैलेख, सुर्खेत दाङलगायत जिल्ला पठाउने गरेको जिल्ला प्रहरी कार्यालय मुगुका सूचना अधिकारी जनबहादुर धामीको भनाइ छ । गत वर्ष १२ जना, अघिल्लो वर्ष २१ जना कैदीबन्दी जिल्लाबाहिर पठाइएको उनले बताए । एकजना कैदीबन्दी जिल्लबाहिर पठाउन नाैजना सुरक्षाकर्मी र एक लाख खर्च हुने जिल्ला प्रहरी कार्यालय जनाएको छ ।
