- वि.सं २०८१ बैशाख ७ शुक्रबार
गण्डकी र लुम्बिनी प्रदेशमा प्रदेश प्रमुखले शपथग्रहण गरेका छन् । बुधबार साँझ राष्ट्रपति विद्यादेवी भण्डारीले शीतलनिवासमा एक समारोहबीच गण्डकी प्रदेश प्रमुख पृथ्वीमान गुरुङ र लुम्बिनी प्रदेश प्रमुख अमिक शेरचनलाई शपथग्रहण गराएकी हुन् ।
शपथग्रहण समारोहमा उपराष्ट्रपति नन्दबहादुर पुन, प्रधानमन्त्री शेरबहादुर देउवा, सभामुख अग्निप्रसाद सापकोटा, राष्ट्रिय सभा अध्यक्ष गणेश तिमल्सिनालगायत सहभागी थिए । राष्ट्रपति भण्डारीले मंगलबार सरकारको सिफारिसमा गुरुङ र शेरचनलाई संविधानको धारा १६३ को उपधारा (२) बमोजिम प्रदेश प्रमुख नियुक्त गरेकी थिइन् । गुरुङ र शेरचन दुवैजना चितवनका हुन् ।
मंगलबार बसेको मन्त्रिपरिषद् बैठकले गण्डकी प्रदेशमा सीताकुमारी पौडेललाई हटाएर गुरुङ र लुम्बिनी प्रदेशमा धर्मनाथ यादवलाई हटाएर शेरचनलाई प्रदेश प्रमुख नियुक्त गर्न सिफारिस गरेको थियो । गुरुङ कांग्रेस र शेरचन माओवादी केन्द्रको कोटाबाट प्रदेश प्रमुख नियुक्त भएका हुन् ।
शेरचन करिब तीन महिनाअघिसम्म गण्डकी प्रदेशको प्रमुख थिए । उनी ०७४ को आमनिर्वाचनपछि बनेको केपी ओली नेतृत्वको नेकपा नेतृत्वको सरकारको सिफारिसमा गण्डकी प्रदेश प्रमुख भएका थिए । नेकपा विभाजनपछि शेरचनलाई ओली सरकारले २० वैशाख ०७८ मा पदमुक्त गरेको थियो ।
