- वि.सं २o७८ असार ३१ बिहीबार
विराटनगरकाे जोगबनी नाकाबाट लागुऔषध र साना हतियारको तस्करीमा संलग्न एक भारतीय नाइकेलाई प्रहरीले पक्राउ गरेको छ । बुधबार राति १० बजे खुला सिमानाको फाइदा उठाउँदै नेपाल प्रवेश गर्दै गर्दा सशस्त्र प्रहरीको टोलीले एक थान पेस्तोल र लागुऔषधसहित नाइके भारतीय नागरिक ४१ वर्षीय पप्पुकुमार पटेललाई पक्राउ गरेको हो ।
भारत बिहार राज्यको अररिया जिल्ला जोगवनीनगर पञ्चायत– ९ इन्द्रनगर बस्ने नाइके पटेल सीमा क्षेत्रमा बसेर लामो समयदेखि लागुऔषध र साना हतियारको कारोबारमा संलग्न रहँदै आएको प्रहरीको दाबी छ ।
इलाका प्रहरी कार्यालय रानीका अनुसार पटेलले बोकेको झोलाभित्र एक थान कटुवा पेस्तोल, लागुऔषध एभिल दुई सय ९२ र लुपिजेसिक दुई सय ९५ एम्पुल तथा एउटा चक्कु र दुईवटा मोबाइल बरामद भएको छ ।
