कोरोना भाइरस (कोभिड–१९) संक्रमणका कारण बाग्लुङका एक युवाको मृत्यु भएको छ । जिल्लाको जैमिनी नगरपालिका–५ बिनामारेका एक पुरुषको चितवनको भरतपुर अस्पतालमा उपचारका क्रममा मृत्यु भएको हो ।
यही वैशाख १० गते कोरोना पुष्टि भएका युवालाई वैशाख १४ गते अस्पतालमा भर्ना गरिएको भरतपुर अस्पतालले विज्ञप्तिमार्फत जानकारी दिएको छ । उनको वैशाख १६ गते भेन्टिलेटरमा राखी उपचार गराइएको अवस्थामा शुक्रबार साँझ मृत्य भएको अस्पतालले जनाएको छ । मृत्यु भएका युवा लामो समयदेखि चितवनमै बस्दै आएको पारिवारिक स्राेतले जनाएको छ ।
यो सँगै बाग्लुङमा कोरोना संक्रमणबाट मृत्यु हुनेको संख्या १३ पुगेको स्वास्थ्य कार्यालय बाग्लुङले जनाएको छ । सरकारले कोरोना संक्रमणको दर बढ्दै गएको भन्दै सचेत अपनाउन आग्रह गरेपछि अझै विभिन्न भोजभतेर, विवाह, उत्सवजस्ता क्रियाकलाको भिडभाडले झनै जोखिम बढ्दै गएको हुँदा सर्वसाधारणले स्वास्थ्यको मापदण्ड अनिवार्य पालना गर्नुपर्ने स्वास्थ्य कार्यालयले जनाएको छ ।