जनता समाजवादी पार्टी (जसपा)का वरिष्ठ नेता राजेन्द्र महतोले संसद् पुनर्स्थापनासँगै प्रधानमन्त्री केपी ओलीको प्रतिगमन सच्चिएको बताएका छन् । जसपा कञ्चनपुरद्वारा मंगलबार महेन्द्रनगरमा आयोजित पत्रकार सम्मेलनमा महतोले सर्वोच्च अदालतको फैसलाले ओलीको प्रतिगमन सच्चिएको बताएका हुन् । 

‘एकप्रकारको प्रतिगमन सच्चिएको छ,’ उनले भने, ‘अब अर्को प्रतिगमन सच्चिन बाँकी छ, त्यो हो, संविधान संशोधन ।’ कांग्रेस र कम्युनिस्टले खोक्रो राष्ट्रवाद देखाएको उनको आरोप छ । 

पूर्वमन्त्रीसमेत रहेका महतोले ओली नेतृत्वको सरकार जनतामारा भएको आरोप पनि लगाए । जसपा अहिले सरकारमा नजाने पनि उनले बताए । उनले संविधान संशोधन, टीकापुर काण्डमा जेलमा रहेका जसपा सांसद् रेशम चौधरीको रिहाइ हुनुपर्ने बताए । ‘जसपा त्यसै सरकारमा जाँदैन,’ उनले भने, ‘हाम्रा मुद्दा सम्बोधन हुने स्थिति भए मात्रै सरकारमा जान्छौँ ।’