- वि.सं २o७७ फाल्गुण १३ बिहीबार
प्रतिनिधिसभा पुनर्स्थापनासँगै सांसदहरूले पुसदेखिकै तलब पाउने भएका छन् । गत ५ पुसमा प्रतिनिधिसभा विघटन भएपछि सांसदहरूको पारिश्रमिक रोकिएको थियो ।
पुसदेखि रोकिएको तलब सांसदहरूले अब एकमुस्ट पाउनेछन् । संसद् सचिवालयका सूचना अधिकारी दशरथ धमला भन्छन्, ‘कानुनबमोजिम उहाँहरूले पाउने सुविधा पाउनुहुन्छ ।’
तर, सांसदहरूले उक्त तलब पाइसकेका छैनन् । फागुन महिनाको पारिश्रमिक पठाउँदा पुसदेखिकै तलब पठाउनेबारे छलफल भइरहेको सचिवालयका एक कर्मचारीले बताए ।
अहिले संघीय संसद्का सांसदहरूले मासिक ६४ हजार ७० रुपैयाँ तलब पाउँदै आएका छन् । मुख्य सचेतकको तलब ७० हजार सात सय ३० रुपैयाँ छ । संघीय संसद् विपक्षी दलको नेताको तलब पनि सत्तरी हजार सात सय ३० रुपैयाँ छ ।
संघीय संसद्का समिति सभापतिहरूको तलब ६७ हजार ३० रुपैयाँ छ । संघीय संसद सत्ता पक्षका सचेतकको तलब ६७ हजार ३० रुपैयाँ रहेको छ ।
