- वि.सं २o७७ माघ १३ मंगलबार
नेपाल प्रहरीले हुम्लामा एक सय दश कार्टुन अवैध चिनियाँ मदिरा बरामद गरी नष्ट गरेको छ । खार्पुनाथ गाउँपालिकामा रहेको खार्पु प्रहरीले एक सय दश कार्टुन अवैध चिनियाँ मदिरा गाउँ भित्र्याउने क्रममा छिप्रा पुलबाट बरामद गरेको हो ।
आज बिहान ३ बजेको समयमा गाउँ भित्र्याउने क्रममा मदिरा बरामद गरिएको जिल्ला प्रहरी कार्यलय हुम्लाका प्रहरी नायव उपरीक्षक सूर्यप्रकाश सुवेदीले जानकारी दिए । आज बरामद भएकाे मदिरा अहिलेसम्मकै ठूलो परिमाणको भएकाे प्रहरी नायव उपरीक्षक सुवेदीले बताए ।
बरामद भएकाे अवैध चिनियाँ मदिरा ‘झनिगिन्टी’ जनप्रतिनिधिको रोहवरमा नष्ट गरिएको जिल्ला प्रहरी कार्यलय हुम्लाले जानकारी दिएकाे छ । अवैध मदिरा भित्र्याउने व्यापारीलाई भने प्रहरीले सार्वजनिक गरेको छैन ।
बरामद गरिएको चिनियाँ मदिराको नेपाली मूल्य करिब १० लाख ४० हजार पर्ने प्रहरीले जनाएको छ । गाउँमा मात्रै नभई अवैध चिनियाँ मदिरा सदरमुकाम सिमकोटमा पनि भित्रिएको स्राेतले जनाएको छ । यस सम्बन्धमा प्रहरीले आवश्यक अनुसन्धान जारी राखिएको जनाएको छ ।
