- वि.सं २o७७ मङ्सिर २० शनिबार
भारतमा आन्दोलनरत किसानहरुले बन्दको घोषणा गरेका छन् । आफ्ना माग पूरा गर्न सरकारले अटेरी गरेकाले यही डिसेम्बर ८ तारिखका दिन देशभरि बन्दको आह्वान गरिएको उनीहरूले बताएका छन् ।
किसानहरूका नेता गुर्नाम सिंह चाडोनीले पत्रकार सम्मेलनमार्फत भारत बन्दको आह्वान गरिएको जानकारी दिए । आफ्ना माग पूरा गर्नका लागि शनिबारको वार्तामा पनि सरकारले पर्याप्त लचकता नदेखाएमा देशभरि बन्द गराइने उनले बताए ।
कृषिसम्बन्धी नयाँ कानुनप्रति असन्तुष्टि जनाउँदै भारतमा केही समयदेखि किसानहरू देशव्यापी रूपमा आन्दोलित छन् । किसान नेता हर्भिन्डर सिंह लख्वाले भने, ‘हाम्रो बैठकले आफ्ना माग पूरा गर्न सरकारलाई दबाब दिनका लागि यही डिसेम्बर ८ तारिखका दिन भारत बन्दको आह्वान गर्ने निर्णय गरेको छ ।’
हालै ल्याइएका कृषिसम्बन्धी कानुन रद्द नगरिएमा देशव्यापी बन्दअन्तर्गत सबै सडकमा अवरोध गरिने उनले बताए ।
सरकारले ल्याएको कानुन लागू भएपछि किसानहरू थप मर्कामा पर्ने, कृषिजन्य उत्पादनले पर्याप्त मूल्य नपाउने दाबी आन्दोलनरत किसानहरूको छ ।
केही महिनाअगाडि नै पारित भएको कानुनप्रति किसानहरूले त्यतिवेलादेखि नै असन्तुष्टि जनाउँदै आए पनि आन्दोलन भने केही समयअगाडिदेखि मात्रै सुरु भएको हो ।
अहिले केन्द्रीय राजधानी नयाँदिल्लीलाई समेत प्रभावित पार्ने गरी आन्दोलन सुरु भएकाले केन्द्रीय सरकार अहिले दबाबमा परेको छ ।
आन्दोलन चर्किदै गएपछि सरकारले किसानहरूसँग पटक–पटक वार्ता पनि गरेको छ । तर, वार्ता परिणाममुखी हुन सकेको छैन ।
