नेपाल राष्ट्र बैंकले यसपटकको दसैँमा नयाँ नोट सटही नगर्ने भएको छ ।
कोभिड– १९ संक्रमणको जोखिमका कारण दसैँलक्षित नयाँ नोट सटही नगर्ने निर्णय भएको नेपाल राष्ट्र बैंकले जनाएको छ ।
राष्ट्र बैंकका प्रवक्ता डा. गुणाकर भट्टले दसैँमा नयाँ नोट सटहीको व्यवस्था गर्दा लामो लाइन बस्ने र भिड हुन गई संक्रमणको जोखिम झनै बढने भएकाले यसपटकको दसैँलक्षित नयाँ नोट सटही नगर्ने निर्णय भएको जानकारी दिए ।
यस्तै अन्य बैंकहरूमा समेत संक्रमणको जोखिम उच्च भएकोले दसैँका लागि लक्षित गरी नयाँ नोट सटहीको व्यवस्था कुनै पनि बैंकमा नगरिएको उनले बताए ।
यद्यपि आफ्नो खातामा भएको रकम बैंकबाट निकाल्दा केही सुकिला र नयाँ नोट पाउन सक्ने अवस्था भने रहेको प्रवक्ता भट्टले बताए ।
यसअघिका वर्षहरूमा दसैँमा लामो लाइनमा बसेर नयाँ नोटको सटही गर्ने व्यवस्था राष्ट्र बैंकले मिलाउँदै आएको थियो ।
जुन एक किसिमले प्रचलनको रूपमा पनि स्थापित भइसकेको छ ।
राष्ट्र बैंकले पाँच रुपैयाँ, १० रुपैयाँ, २० रुपैयाँ, ५० रुपैयाँ र एक सय रुपैयाँ दरका नयाँ नोटहरू दसैँको वेलामा सटही गर्दै आएको थियो ।
यस वर्ष भने राष्ट्र बैंकसँग नयाँ नोट मौज्दात भए पनि कोभिड संक्रमणको जोखिमका कारण नोट सटही असम्भव भएको जनाएको हो ।
नेपालीहरूको महान् चाड दसैँका वेला टीका लगाएर आफन्तजनलाई नयाँ नोट दक्षिणा दिने प्रचलन रहिआएको छ । जसले गर्दा हरेक वर्षका दसैँमा नेपाल राष्ट्र बैंकले नयाँ खुद्रा नोट सटही गर्दै आएको छ ।