धनकुटा नगरपालिका– ९ गुठीटारमा पहिरोले एक घर पुरेको छ । वर्षाका कारण माथिबाट खसेको पहिरोले गुठीटारका हेमकुमार राईको घर पुरेको हो । पहिरोले पुर्दा राईको एकतले घर पूर्ण रूपमा क्षति भएको जिल्ला प्रहरी कार्यालय धनकुटाका प्रमुख एसपी गोविन्द अधिकारीले बताए ।
घरमाथिबाट आएको पहिरोले थिच्दा घर लडेको छ । पहिरोका कारण करिब चार लाखबराबरको क्षति भएको प्रहरीले प्रारम्भिक अनुमान गरेको छ । उक्त पहिरोले घर पुर्दा हेमकुमारकी १२ वर्षीया छोरी सुनिता राई घाइते भएकी छिन् ।
उनको जिल्ला अस्पताल धनकुटामा उपचार भइरहेको छ । बालिकाको स्वास्थ्य अवस्था सामान्य रहेको प्रहरीले बताएको छ । सो घरमा राईको पाँचजनाको परिवार बस्दै आएकाे थियो ।
पहिरोले घर पुरेपछि उनीहरू विस्थापित भएका छन् । अहिले उनीहरू छिमेकीको शरणमा बस्दै आएको धनकुटा नगरपालिका– ९ का वडाध्यक्ष सन्दीप रायमाझीले बताए ।