कांग्रेस महामन्त्री पूर्णबहादुर खड्काले सरकारको कारणले हत्या, हिंसा र भ्रष्टाचारका गतिविधि बढिरहेको आरोप लगाएका छन् । कांग्रेस तरुण विभागले शनिबार आयोजना गरेको कार्यक्रममा खड्काले सरकार र सत्तारुढ दलको नेतृत्वमा हत्या, हिंसा र भ्रष्टाचारका गतिविधि भइरहेको आरोप लगाएका हुन् ।
सरकारको रवैया र आन्तरिक खिचातानीका कारण जनताले दुःख पाएको बताउँदै उनले सरकारलाई खबरदारी गर्न कांग्रेस कमजोर नरहेको जिकिर गरे । कांग्रेसले प्रतिपक्षको भूमिका निभाउन नसकेको गुनासो रहे पनि शान्तिपूर्ण राजनीतिमार्फत सरकारलाई खबरदारी गरिरहेको उनको दाबी छ ।
उनले सरकारका गलत निर्णय र सत्तारुढ दलको रवैयाले निराशामा रहेका जनतालाई भरोसा दिन तरुण दलले काम गर्नुपर्ने बताए ।