कांग्रेसका केन्द्रीय सदस्य तथा पूर्वमहामन्त्री कृष्णप्रसाद सिटौलाले आफूनिकट नेताहरूसँग छलफल गर्न बैठक बोलाएका छन् ।
०७७ को ७ देखि १० फागुनसम्म काठमाडौंमा हुने १४ औं महाधिवेशनको तयारीमा पार्टी जुटेपछि सिटौलाले बैठक बोलाएका हुन् । बत्तिसपुतलीमा दिउँसो १२ बजे बैठक बस्ने बताइएको छ ।
सिटौला समूहका नेता प्रदीप पौडेलले कृष्णप्रसाद सिटौलाले बैठक बोलाएको जानकारी दिए । उनले नयाँ पत्रिकासँग भने, ‘बैठक बोलाउनु भएको हो । पार्टीकै विषयमा छलफल हुन्छ होला । यसबाहेक अन्य जानकारी छैन ।’
बैठकमा सिटौलासहित कांग्रेस केन्द्रीय सदस्यहरू शिव हुमागाईं, प्रदीप पौडेल, गगन थापा लगायत उपस्थित हुने बताइएको छ । उमाकान्त चौधरी भने पार्टीकै काममा बारा छन् ।
सिटौलाले आफू निकटका नेताहरूसँग छलफल गरेर महाधिवेशनको रणनीति बनाउने बुझिएको छ । कांग्रेसभित्र पछिल्लो समय १४ औं महाधिवेशनकेन्द्रित गुटगत भेलाले तीव्रता पाएको छ ।