ग्लोबल आइएमई बैंकको प्रमुख कार्यकारी अधिकृत (सिइओ) मा परशुराम कुँवर क्षेत्रीले पद बहाली गरेका छन् । ग्लोबल आइएमईमा जनता बैंक गाभिएपछि २० मंसिरदेखि एकीकृत कारोबार सुरु भएको हो । मर्जरको औपचारिक कार्यक्रमपछि बैंकका अध्यक्ष चन्द्रप्रसाद ढकालले क्षेत्रीलाई पद बहाली गराएका हुन् ।
तीन दशकभन्दा बढी समय बैंकिङ क्षेत्रमा रहेका क्षेत्री ०७४ साल असार १ गतेदेखि जनता बैंक नेपालको सिइओ थिए । यसअघि उनले तत्कालीन बैंक अफ एसिया र ग्रान्ड बैंकमा सिइओका रूपमा काम गरेका थिए ।
तत्कालीन ग्रिनलेज बैंकबाट ०४२ सालदेखि बैंकिङ क्यारियर सुरु गरेका क्षेत्रीले तत्कालीन सरकारले विदेशी विज्ञहसमेतको सहभागितामा गठन गरेको नेपाल बैंक लिमिटेडको वित्तीय सुधार कार्यक्रमको टिममा कार्य गरेका थिए ।
एकीकृत कारोबारपछि ग्लोबल आइएमई बैंकको प्राथमिक पुँजी कोष २४ अर्ब, कुल निक्षेप २ अर्ब १३ करोड तथा कुल कर्जा १ अर्ब ९४ करोड रुपैयाँभन्दा बढी पुगेको छ । त्यस्तै, देशभर बैंकका ३ सयभन्दा बढी शाखा, २ सय ५९ एटिएम, २४४ शाखारहित बैंकिङ सेवा, ३३ एक्स्टेन्सन तथा राजस्व काउन्टर तथा ३ वटा वैदेशिक प्रतिनिधि कार्यालय पुगेको बैंकले जनाएको छ ।