आगामी १४ मंसिरमा हुने उपनिर्वाचनमा लमजुङको सुन्दरबजार नगरपालिका–२ परेवाडाँडामा वडाध्यक्ष पदका लागि ५ जनाले उम्मेदवारी दर्ता गराएका छन् । मुख्य निर्वाचन अधिकृतको कार्यालयमा बुधबार ४ राजनीतिक दल र एक जना स्वतन्त्र गरी ५ जनाले उम्मेदवारी दर्ता गराएका हुन् ।
वडाध्यक्षका लागि नेकपाका नविनकुमार श्रेष्ठ, कांग्रेसका प्रकाश सेढाइँ, राप्रपाका पवनराज बसौला, मंगोल नेशनल अर्गनाइजेशन पार्टीका रामजी दर्जी र कांग्रेसबाट छुट्टिएर बनेको स्वतन्त्र समूहका कृष्णबहादुर केसीले मनोनयन दर्ता गरेका हुन् । स्थानीय तह साथै प्रदेश तथा संघको चुनावमा कांग्रेसबाट बागी उम्मेदवारी दिएका समूहले स्वतन्त्रबाट उम्मेदवारी दिएका छन् ।
स्थानीय तह चुनावमा सुन्दरबजार नगरपालिका-२ मा वडाध्यक्ष पदमा निर्वाचित तत्कालीन एमालेका लोकराज पाण्डे जिल्ला समन्वय समितिमा निर्वाचित भएपछि रिक्त रहेको उक्त पदका लागि चुनाव हुन लागेको हो । स्थानीय तह चुनावमा तत्कालीन एमालेका पाण्डेले ९ सय ५ मत ल्याएर वडाध्यक्षमा विजयी भएका थिए । निकटत्तम प्रतिद्वन्द्वी कांग्रेसका पर्शुराम केसीले ३ सय ४७ मत ल्याएका थिए । माओवादी केन्द्रका उम्मेदवार पूर्णबहादुर मौरतीले १ सय ६ मत ल्याएका थिए भने राप्रपाका दीपकराज सेढाइँले ५२ मत पाएका थिए ।
जिल्ला निर्वाचन कार्यालयका निर्वाचन अधिकारी सृजना मिश्रका अनुसार यस वडामा २ हजार १ सय २४ मतदाता रहेकोमा उप–निर्वाचनमा मतदाता संख्या बढेर २ हजार २ सय ९७ पुगेको छ । उप–निर्वाचनका लागि उक्त वडामा दुई मतदान स्थल र तीन मतदान केन्द्र तोकिएको छ ।