- वि.सं २o८१ चैत २२ शुक्रबार
शिक्षकहरूसँग सरकारले गरेका सहमतिसहित यथाशक्य छिटो विद्यालय शिक्षा विधेयकलाई ऐनको रूप दिनुपर्ने माग राख्दै शिक्षकहरू दुई दिनदेखि काठमाडौंकेन्द्रित आन्दोलनमा छन् । बिहीबार बिहान ११ बजेदेखि माइतीघर मण्डलामा उपस्थित भएर उनीहरूले बुधबारकै नारा दोहोर्याउँदै सरकारको ध्यानाकर्षण गराए । आफूहरूका मुद्दा सम्बोधन नभएसम्म आन्दोलन नछाड्ने अडानसहित सडकमा आएका उनीहरू यसपटक सामान्य सम्झौता गरेर मात्रै पछि नहट्ने अडानमा छन् ।
‘सरकारले जबसम्म विद्यालय विधेयकलाई अघि बढाउँदैन र निचोडमा पुर्याउँदैन, तबसम्म आन्दोलन त्याग्दैनौँ,’ नेपाल शिक्षक महासंघका अध्यक्ष लक्ष्मीकिशोर सुवेदीले भने, ‘देशभरका शिक्षकहरू आन्दोलनका लागि काठमाडौं आउनुभएको छ, शिक्षकलाई सरकारले धेरै दुःख नदियोस् ।’ दुई दिनदेखि सडकमा आन्दोलनरत शिक्षकका मागबारे सरकारी तहमा छलफल भएको छ । बिहीबार साँझ कार्यवाहक प्रधानमन्त्री प्रकाशमान सिंह, गृहमन्त्री रमेश लेखक, शिक्षामन्त्री विद्या भट्टराई, शिक्षासचिवलगायतको उपस्थितिमा शिक्षकहरूको मागबारे छलफल भएको हो । छलफलमा शिक्षक आन्दोलनका प्रतिनिधिलाई भने राखिएको थिएन ।
शिक्षामन्त्री भट्टराईले शिक्षकको आन्दोलन चर्किने भन्दै कार्यावाहक प्रधानमन्त्री, गृहमन्त्रीलगायतसँग छलफलका लागि समय माग गरेकी थिइन् । बैठकले कुनै निचोड भने निकालेको छैन । थप बैठक बसेर उनीहरूका मागबारे निर्णयमा पुगिने शिक्षा मन्त्रालयले जनाएको छ । गृहमन्त्री लेखकले शिक्षा विधेयक अघि बढाइने र शिक्षकहरूका माग सम्बोधन हुने बताए । ‘शिक्षा विधेकय शिक्षा समितिमा छ, विधेयकलाई अगाडि बढाउने भन्ने सन्दर्भ बढीभन्दा बढी राम्रो बनाउने र शिक्षकका माग सम्बोधन गर्न हामीले केही छलफल गरेका छौँ, चाँडोभन्दा चाँडो सम्बोधन गर्नुपर्छ, उहाँहरूका मागबारे सरकार गम्भीर छ,’ उनले भने, ‘विधयकलाई चाँडै अघि बढाउने हो, अहिले छलफल मात्रै गरेका छौँ ।’
